ဗန်းမော်မြို့ကို နစကတပ်က ပြန်ထိန်းချုပ်ထား
ဒီဇင်ဘာ ၁၈
ကချင်ပြည်နယ်ရဲ့ ဒုတိယမြို့တော်ဖြစ်တဲ့ ဗန်းမော်မြို့ကို KIA ပူးပေါင်းတပ်တွေက ထိုးစစ်ဆင် တိုက်ခိုက်လျက်ရှိတာမှာ လက်ရှိမှာတော့ နစကတပ်ဘက်က မြို့ကို ပြန်ထိန်းချုပ်ထားတယ်လို့ ဒေသခံတွေဆီက သိရပါတယ်။
ဗန်းမော်မြို့ကို ပြီးခဲ့တဲ့ ဒီဇင်ဘာ ၄ ရက်နေ့ကစပြီး KIA ပူးပေါင်းတပ်တွေက ထိုးစစ်ဆင် တိုက်ခိုက်နေတာဖြစ်ပြီး မြို့တွင်းအထိ ဝင်ရောက်နိုင်ခဲ့ပေမယ့် နစကဘက်က လေကြောင်းအားပြုပြီး ပြန်လည် တိုက်ခိုက်ခဲ့တာကြောင့် တိုက်ပွဲကာလ ကိုးရက်လောက်အကြာမှာ မြို့ကို ပြန်ထိန်းထားနိုင်တာ ဖြစ်တယ်လို့ သိရပါတယ်။
“ကျွန်တော်တို့ သိသလောက်ကတော့ ပထမပိုင်းမှာတော့ အနားမှာရှိတဲ့ နစကတပ်တွေကို KIA က ပတ်ပတ်လည်ကနေ ဝိုင်းတိုက်နေတာ။ နောက်ပိုင်း နစကတပ်ဘက်က အင်အားသုံး ပြန်တိုက်တဲ့အခါမှာတော့ သူတို့ တော်တော်အထိနာပြီး အဲဒီနောက်ပိုင်းတော့ သိပ်မတိုက်တော့ဘူး။ ငြိမ်သွားတယ်။ လတ်တလောမှာတော့ ပစ်ခတ်မှုက အနည်းအကျဉ်းတော့ ရှိသေးတယ်။ ဒါပေမယ့် အရင်လောက်တော့ မဆိုးတော့ဘူး။ အခု အခြေအနေထိကို ပြောတာနော်။ နောက် အခြေအနေကတော့ ဘယ်လိုလာဦးမလဲ ကျွန်တော်တို့လည်း မသိသေးပါဘူး” လို့ ဗန်းမော်မြို့၊ ပင်စင်ကုန်းရပ်ကွက်မှာ နေထိုင်သူတယောက်က ပြောပါတယ်။
တိုက်ပွဲ စတင် ဖြစ်ပွားချိန်ကစလို့ မြို့တွင်းရှိ ဒေသခံတွေဟာ နီးစပ်ရာမြို့တွေကို တိမ်းရှောင်သွားကြပြီ ဖြစ်တဲ့အတွက် မြို့ခံလူဦးရေရဲ့ ရာခိုင်နှုန်း အနည်းစုလောက်သာ မြို့တွင်းမှာ ကျန်ရစ်ခဲ့ကြတယ်လို့ သိရပါတယ်။
“အများစုကတော့ မန္တလေးရောက်ကုန်ကြပြီ။ အရင်ဆုံး ကိုယ့်အိမ်မှာကိုယ် မနေရဲကြလို့ ဘုန်းကြီးကျောင်းတွေ၊ သီလရှင်ကျောင်းတွေမှာ စစ်ရှောင်ကြတယ်။ အဲဒီကနေမှ ကယ်ဆယ်ရေး လုပ်တဲ့သူတွေကနေတဆင့် မန္တလေး ရောက်တဲ့သူကရောက်၊ တခြားမြို့တွေ ရောက်တဲ့သူက ရောက်ပေါ့။ တချို့ ရွာတွေ၊ ရပ်ကွက်တွေမှာဆို လူတယောက်လောက်ပဲ ကျန်ခဲ့တော့တာရှိတယ်။ ကျန်ခဲ့တဲ့သူတွေကတော့ စားရေးသောက်ရေးအတွက် ကြုံသလိုဖြေရှင်းနေရတာပဲ။ ကျန်နေတဲ့ တချို့ ဒေသခံတွေလည်း ဗန်းမော်ကထွက်ဖို့ ကြိုးစားနေကြတယ်။ ပစ်ခတ်မှုတွေဖြစ်တော့ ဒီကြားထဲ လူသေဆုံးတာ၊ ဒဏ်ရာ ရတာတွေလည်း ရှိတယ်။ အခုက တိုက်ပွဲက မြို့တွင်းမှာတော့ မရှိတော့ဘူး။ မြို့ပတ်ပတ်လည်မှာတော့ ဖြစ်နေသေးတယ်” လို့ ရိုးကြီးရပ်ကွက်မှာ နေထိုင်သူတယောက်က ပြောပါတယ်။
လေကြောင်းတိုက်ခိုက်မှုနဲ့ လက်နက်ကြီး ကျရောက် ပေါက်ကွဲမှုတွေကြောင့် ပါရာဒိုက်ဟိုတယ်၊ ချယ်ရီတန် ကိုယ်ပိုင်အထက်တန်းကျောင်း၊ ခွန်သာရပ်ကွက်နဲ့ စာတိုက်ရုံး အနီးတဝိုက်တို့မှာ နေအိမ် မီးလောင်ပျက်စီးမှုတွေ ထပ်မံ ဖြစ်ပေါ်ခဲ့တယ်လို့ ဒေသခံတွေက ပြောပါတယ်။
ဗန်းမော်မြို့ဟာ အမှတ် (၂၁) စစ်ဆင်ရေးကွပ်ကဲမှုဌာနချုပ် (စကခ - ၂၁) အခြေစိုက်ရာမြို့ဖြစ်ပြီး ခြေလျင်တပ်ရင်းတွေဖြစ်တဲ့ ခလရ - ၂၃၆၊ ၄၇ နဲ့ အမြောက်တပ်တွေဖြစ်တဲ့ အမတ - ၃၃၆ ၊ ၃၀၄ ၊ အမှတ် (၇၀၀၆) သံချပ်ကာတပ်၊ အမှတ် (၅၀၁၄) တင့်ကားတပ်တွေအပြင် လက်ရုံးတပ်ရင်း ငါးရင်းခန့် အခြေစိုက်ထားတဲ့ တပ်မြို့ဖြစ်တယ်လို့ သိရပါတယ်။
အခု ၂၀၂၄ ခုနှစ်၊ မတ်လမှ စတင်ခဲ့တဲ့ ကချင်ပြည်နယ်ထိုးစစ်အတွင်း KIA က ရှမ်းမြောက်မှ မဘိမ်းမြို့နဲ့ ကချင်ပြည်နယ်မှ ဆွမ်ပရာဘွမ်၊ အင်ဂျန်းယန်၊ ဆဒုံး၊ ချီဖွေ၊ ဆော့လော်၊ ဖီမော်၊ ပန်ဝါ၊ ဒေါ့ဖုန်းယန်၊ ဆင်ဘို၊ မြို့လှ၊ မိုးမောက်မြို့တွေနဲ့ နယ်စပ်ကုန်သွယ်ရေးမြို့ဖြစ်တဲ့ လွယ်ဂျယ်မြို့တို့ကို သိမ်းပိုက်ထားပြီး ဖြစ်တယ်လို့ သိရပါတယ်။
Photo:CJ
Credit - VOM News Agency
#သတင်းဟင်းလေးအိုးကြီး
