သာစည်-ရွှေညောင်ရထား ပြန်ပြေးဆွဲနိုင်ရန် ဆောင်ရွက်နေ
သာစည်-ရွှေညောင်ရထား ရထားအမြန်ဆုံး ပြန်လည်ပြေးဆွဲနိုင်ရေးအတွက် ဆောင်ရွက်နေကြောင်း မြန်မာ့မီးရထားထံမှ သိရသည်။
ယင်းရထားလမ်းပိုင်းသည် ပြီးခဲ့သည့် စက်တင်ဘာလအတွင်းက ရာဂီမုန်တိုင်းအရှိန်ကြောင့် ရထားလမ်းပျက်စီးခဲ့ခြင်းဖြစ်ကာ အမှတ် (၁၄၁) အဆန်/ (၁၄၂) အစုန် သာစည် - ရွှေညောင်ရထား ပြေးဆွဲမှုကို ရပ်နားထားရခြင်း ဖြစ်သည်။
ရာဂီမုန်တိုင်းအရှိန်ကြောင့် သာစည်-ရွှေညောင် ရထားလမ်းပိုင်းရှိ ဆင်တောင်-မြင်းဒိုက်ကြားရှိ ရထားလမ်း တာပေါင်နေရာများ၊ ကမ်းပါးနီဥမင် အဝင်၊ အထွက် နေရာများ၊ ဆင်တောင်ဘူတာ၊ မြင်းဒိုက်ဘူတာနှင့် ခွေးရုပ်ဘူတာများ ပျက်စီးခဲ့ခြင်း ဖြစ်သည်။
ထို့ပြင် တောင်ကြီး-ပေါမူ ရထားလမ်းပိုင်း၌လည်း ရထားလမ်း အူကြောင်းနှင့် တံတားတချို့ ထိခိုက်ပျက်စီးမှု ရှိခဲ့ပြီး ပြုပြင်တည်ဆောက်မှုများ ပြုလုပ်နေကြောင်း ဆိုသည်။
ပျက်စီးခဲ့သည့် ရထားလမ်းပိုင်းနေရာများ ပြန်လည်ပြုပြင်ဆောင်ရွက်နေမှုကို ပို့ဆောင်ရေးနှင့် ဆက်သွယ်ရေးဝန်ကြီးဌာန ဒုတိယဝန်ကြီး ဦးအောင်မြိုင်နှင့် မြန်မာ့မီးရထားတာဝန်ရှိသူများက ဒီဇင်ဘာ(၁၀)ရက်မှ (၁၂)ရက်အထိ သွားရောက် စစ်ဆေးခဲ့ပြီး အမြန်ဆုံးပြီးစီးအောင် ဆောင်ရွက်ရန် မှာ ကြားခဲ့သည်ဟုလည်း သိရသည်။
