အရေးပေါ်အကူအညီလိုအပ်နေတဲ့ ထိပ်ဆုံးနိုင်ငံထဲ မြန်မာပါဝင်

ဒီဇင်ဘာ ၁၂

အရေးပေါ် လူသားချင်းစာနာထောက်ထားမှုအကူအညီလိုအပ်နေတဲ့ နိုင်ငံ ၂၀ ထဲမှာ မြန်မာက ဆူဒန် နဲ့ ပါလက်စတိုင်းပြီးရင် တတိယနေရာမှာရှိနေတယ်လို့ နိုင်ငံတကာကူညီကယ်ဆယ်ရေးကော်မတီ(IRC)က ဒီဇင် ဘာ ၁၁ ရက်မှာ ထုတ်ပြန်လာပါတယ်။

လက်နက်ကိုင်ပဋိပက္ခတွေ ဖြစ်ပွားနေတဲ့မြန်မာမှာ ၂၀၂၃ နောက်ပိုင်းနေအိမ်စွန့်ခွာထွက်ပြေးရသူတွေ တိုးလာပြီး လူ ၉ သိန်းဝန်းကျင်လောက် စစ်ရှောင်နေရတယ်လို့ IRC က ဆိုပါတယ်။

ဒီနှစ်ထဲမှာ တိုက်ပွဲတွေလည်း ပိုပြင်းထန်လာနေတယ်လို့လည်း ထုတ်ပြန်ချက်မှာ ဆိုထားပါတယ်။

မြန်မာ့ကျန်းမာရေးစနစ်ကိုကြည့်ရင်လည်း ကာလဝမ်းရောဂါနဲ့ တခြားရောဂါတွေရဲ့ ခြိမ်းခြောက်တာခံနေရတယ်လို့ IRC ကပြောပါတယ်။

ရေဘေးကြုံခဲ့ရတာတွေ နဲ့ တခြားသော ရာသီဥတုဖောက်ပြန်ပြီးဖြစ်ပေါ်လာတဲ့ ဘေးဒုက္ခတွေကိုလည်း လိုအပ်ချက်များစွာရှိနေတဲ့ကြားကပဲ ရှေ့နှစ်ထဲမှာ ခါးစည်းခံရဖွယ်ရှိနေတယ်လို့ အသိပေးပါတယ်။

ကရင်နီလူ့အခွင့်အရေးအဖွဲ့ရဲ့ထုတ်ပြန်ချက်အရလည်း ကရင်နီက စစ်ရှောင်ကလေး ၅၀ ရာခိုင်နှုန်းဟာ အာဟာရ ချို့တဲ့နေကြတယ်လို့ ဆိုထားတာပါ။

ကမ္ဘာတဝန်း အတိုင်းအတာနဲ့ လူသားချင်းစာနာထောက်ထားမှုအကူအညီ လိုအပ်နေသူ သန်းပေါင်း ၃၀၀ ကျော် ရှိနေတယ်လို့ IRC ရဲ့ အချက်အလက်က ဖော်ပြပါတယ်။

ဒီလို အကူအညီလိုအပ်နေတဲ့နိုင်ငံတွေကို အကူအညီပေးရေးစနစ် ပြုပြင်ပြောင်းလဲပြီးပေးအပ်ဖို့၊ အရပ်သားကာကွယ်ရေးတိုးမြှင့်ပေးဖို့ အပါအဝင် အချက် ၆ ချက်ကို IRC က ဥရောပသမဂ္ဂ(EU) နဲ့ နိုင်ငံတကာအသိုင်းအဝိုင်းကို တိုက်တွန်းထားပါတယ်။

ပုံစာ - ရန်ကုန်မြို့ဆင်ခြေဖုံးရပ်ကွက်က အမျိုးသားတစ်ဦး

Credit - BBC

#သတင်းဟင်းလေးအိုးကြီး