"မက်ဆီရှိနေရင် ခရစ္စတီယာနိုဆိုတာ အလကားပဲ"

Ilia Topuria က ရီးရဲမက်ဒရစ်ပရိသတ်ဆိုပေမယ့် Cristiano Ronaldo ကို မကြိုက်ပါဘူး။ ကစားဟန်မကြိုက်တာထက် ပုဂ္ဂိုလ်ရေးကြည့်မရဘူးလို့ ရေးတာက ပိုမှန်မယ်။ Cristiano Ronaldo ရဲ့ အဓိကပြိုင်ဘက် Lionel Messi ကိုပဲ သဘောကျတာပါ။ Ilia Topuria နဲ့ Cristiano Ronaldo တို့က တစောင်းစေးနဲ့ မျက်ချေးဆိုသလို သဘာဝမတူကြဘဲ သူတို့ချင်းက ကြုံသလို ဖဲ့နေကြတာပါ။

ခရီးသွားလမ်းကြုံဆိုသလို Ilia Topuria က Cristiano Ronaldo ကို ထိပါးဖူးပါတယ်။ Cristiano Ronaldo ကလည်း Ilia Topuria ကို လေအိုးလေးလို့ ပြန်ပြောတယ်။ သူတို့ချင်းက အခုမှဖြစ်တာတော့ မဟုတ်ဘူး။ စကားစစ်ထိုးနေတာ ကြာလှပါပြီ။ အခုလည်း Ilia Topuria က ဆော်လိုက်ပြန်ပြီ။

"ကျွန်တော့်ကို လေအိုးလေးလို့ ပြောထားတဲ့ ဗီဒီယိုဖိုင်ကို ကြည့်လိုက်ရတယ်လေ။ ခရစ္စတီယာနိုရေ . . . တစ်ခုတော့ ပြောချင်တယ်။ UFC Miami ပြိုင်ပွဲမှာ ကျွန်တော်ဖိတ်ကြားမယ့် တစ်ဦးတည်းသော ဘောလုံးသမားက မက်ဆီပါပဲ။ မက်ဆီလည်း မိုင်ယာမီမြို့မှာ နေတာပဲ။ ကျွန်တော်က ချားလ်အိုလီဗဲရားကို ကစားမှာပါ။ မက်ဆီရှိနေရင် ခရစ္စတီယာနိုဆိုတာ အလကားပဲ"

Ilia Topuria က LM10 ဖန်ဆိုတော့ CR7 ကို ကြုံသလိုဖဲ့တာပါ။ ကျွန်တော်တို့မျိုးဆက်မှာ ဘာကိုဂုဏ်ယူမိသလဲဆိုရင် Cristiano Ronaldo နဲ့ Lionel Messi တို့ရဲ့ အကောင်းဆုံးအချိန်ကို ကြည့်ခွင့်ရလိုက်တာပဲ။ ဒါမျိုးအခွင့်အရေးက ဆောင်ကြာမြိုင်မှာ အပျိုစစ်စစ်ရှာရတာထက်ကို ပိုခက်ခဲတယ်။ နောက်မျိုးဆက်တွေကို ကြွယ်လို့ရပါတယ်။

ကျွန်တော်က ဖျော်ဖြေရေးဆန်တဲ့ Cristiano Ronaldo ကို ပိုကြိုက်ပါတယ်။ ကြိုက်တာ၊ မကြိုက်တာက ကျွန်တော့်ရဲ့ ပုဂ္ဂိုလ်ရေးအမြင်ပါ့ပဲ။ အမှန်တရားဖြစ်ချင်မှ ဖြစ်လိမ့်မယ်။ Lionel Messi လည်း ကောင်းတာပါပဲ။ ဒီလောက်တောင် လုပ်ပြထားတာ ဆရာကြီးနှစ်ပါးက ဘောလုံးသမိုင်းမှာ အကောင်းတကာ အကောင်းဆုံးဆိတ်တွေပါပဲ။ ကျွန်တော့်ပုဂ္ဂိုလ်ရေးအမြင်မပါဘဲ စွမ်းဆောင်ရည်အတိုင်းပြောရရင် အာဂျင်တီးနားဆိတ်ကြီး Lionel Messi က ပေါ်တူဂီဆိတ် Cristiano Ronaldo ထက် အကောင်ပိုကြီးပါတယ်။ အားလုံးလည်း ဆွေးနွေးပေးပါဦး။ စာဖတ်သူတွေ ဘေးကင်းပါစေ။