#အမဲသားလက်ဖက်ဟင်း

အသားဟင်းတွေချည်း ချက်စားရတာ ရိုးအီသွားသူများအတွက် ပုံစံတစ်မျိုးနဲ့ ချက်စားလို့ရအောင်လို့ အမဲသား လက်ဖက်ဟင်း ချက်နည်းလေးကို ဖော်ပြပေးလိုက်ပါတယ်။

ပါဝင်ပစ္စည်းများကတော့ အမဲသား၊ ကြက်သွန်နီ၊ ကြက်သွန်ကြော်၊ ဒိန်ချဉ်၊ ချင်း၊ ကြက်သွန်ဖြူ၊ နနွင်းမှုန့်၊ ဆီ၊ ဆား၊ ဟင်းခတ်မှုန့်၊ လက်ဖက်စိမ်း၊ နံနံပင် တို့ လိုအပ်ပါမယ်။

ပထမဦးဆုံး အမဲအသားကို လိုသလိုလှီးဖြတ်၍ ရေဆေးသန့်စင်ပြီး ဆား၊ ဟင်းခတ်မှုန့်၊ ကြက်သွန်ကြော်၊ ဒိန်ချဉ်၊ ချင်း၊ ကြက်သွန်ဖြူ၊ နနွင်းမှုန့်၊ ဆားနှင့် ဟင်းခတ်မှုန့်တို့ကို ထည့်၍ သမအောင်မွှေပေးပြီး အရသာဝင်အောင် ၁၅ မိနစ်ခန့် နှပ်ထားပါ။

ပြီးနောက် အိုးထဲ ဆီထည့်ပြီး အပူပေးကာ ကြက်သွန်နီကို အရောင်သန်းရုံ ကြော်ပါ။ ပြီးလျှင် နှပ်ထားတဲ့အသားကို ထည့်ကြော်ပါ။ အသားမှ ထွက်လာသော အရည်များခန်းသည်အထိ ကြော်ပါ။

ပြီးနောက် ရေအနည်းငယ်စီထည့်ပြီး အသားနူးသည်အထိ မီးအနည်းငယ်ဖြင့် တည်ပါ။ မကြာခဏ မွှေပေးပါ။

အသားနူးလာပါက လက်ဖက်စိမ်းကို ရေဆေး၍ ရေစင်အောင်ညှစ်ပြီး ထည့်ကာ ဆီပြန်လာသည်အထိ တည်ထားပါ။

နောက်ဆုံးတွင် အသားနှင့်လက်ဖက် နူးအိပြီး ဆီပြန်လာပါက အရသာအပေါ့အငန်မြည်း၍ နံနံပင်အုပ်ကာ တည်ခင်း သုံးဆောင်နိုင်ပါပြီ။