ဘင်္ဂလားပင်လယ်အော်တွင် ဖြစ်ပေါ်နေသည့် လေဖိအားနည်းရပ်ဝန်းမှာ နောက် (၂၄) နာရီအတွင်း ပိုမိုအားကောင်းလာနိုင်
ဘင်္ဂလားပင်လယ်အော် တောင်ပိုင်းနှင့် ယင်းနှင့်ဆက်စပ်နေသည့် အိန္ဒိယသမုဒ္ဒရာအရှေ့ပိုင်းတွင် ဖြစ်ပွားနေသည့် လေဖိအားနည်းရပ်ဝန်းသည် နောက် (၂၄) နာရီအတွင်း ပိုမိုအားကောင်းလာနိုင်ကြောင်း မိုးလေဝသနှင့် ဇလဗေဒဦးစီဌာနက ယနေ့ ဒီဇင်ဘာ (၁၀)ရက်တွင် အသိပေးထုတ်ပြန်ထားသည်။
အဆိုပါ လေဖိအားနည်း ရပ်ဝန်းသည် ဒီဇင်ဘာ (၁၁)ရက်နေ့(မနက်ဖြန်)တွင် ဘင်္ဂလားပင်လယ်အော်အနောက်တောင်ပိုင်း(သီရိလင်္ကာနိုင်ငံကမ်းလွန် - အိန္ဒိယနိုင်ငံ၊ တမီးလ်နာဒူး ကမ်းခြေသို့ ရောက်ရှိလာနိုင်သည်ဟု မိုး/ဇလက ခန့်မှန်းထားသည်။
လတ်တလောတွင် ဒီဇင်ဘာ (၇)ရက်မှစတင်၍ ဖြစ်ပွားနေသည့် လေဖိအားနည်းရပ်ဝန်းသည် ဘင်္ဂလားပင်လယ်အော် တောင်ပိုင်းနှင့် ယင်းနှင့်ဆက်စပ်လျက်ရှိသော အီကွေတာအနီး အိန္ဒိယသမုဒ္ဒရာအရှေ့ပိုင်းတို့တွင် ဆက်လက်တည်ရှိနေသည်ဟု မိုး/ဇလက အသိပေးထားသည်။
