မြန်မာနိုင်ငံနှင့် ချုံချင့်မြို့အကြား စီးပွားရေးနှင့် ရင်းနှီးမြှုပ်နှံမှုလုပ်ငန်းများ ပညာရေး၊ စိုက်ပျိုးရေး၊ စွမ်းအင်ကဏ္ဍများ ပူးပေါင်းဆောင်ရွက်ရေးကိစ္စရပ်များ ဆွေးနွေး

မြန်မာနိုင်ငံနှင့် ချုံချင့်မြို့အကြား စီးပွားရေးနှင့် ရင်းနှီးမြှုပ်နှံမှုလုပ်ငန်းများ ပညာရေး၊ စိုက်ပျိုးရေး၊ စွမ်းအင်ကဏ္ဍများတွင် ပူးပေါင်းဆောင်ရွက်မည့် ကိစ္စရပ်များနှင့် ပတ်သက်၍ ချုံချင့်မြို့မြန်မာကောင်စစ်ဝန်ချုပ်က ချုံချင့်မြူနီစီပယ်အစိုးရဌာနများနှင့် တွေ့ဆုံဆွေးနွေးခဲ့ကြောင်း နိုင်ငံခြားရေးဝန်ကြီးဌာန၏ ထုတ်ပြန်ချက်အရ သိရသည်။

မြန်မာကောင်စစ်ဝန်ချုပ်ရုံး၊ ချုံချင့်မြို့မှ ကောင်စစ်ဝန်ချုပ် ဦးကျော်ဇေယျာလင်းက ဒီဇင်ဘာ (၅) ရက်က ချုံချင့်မြူနီစီပယ်အစိုးရ နိုင်ငံခြားရေးရာဌာနမှ ဒုတိယ ညွှန်ကြားရေးမှူးချုပ် Mr. Feng Zimin ဦးဆောင်သည့် ချုံချင့်မြူနီစီပယ်အစိုးရဌာနများ၏ သက်ဆိုင်ရာတာဝန်ရှိသူများနှင့် ချုံချင့်မြို့၊ နိုင်ငံခြားရေးရာဌာန၌ တွေ့ဆုံခဲ့ခြင်းဖြစ်သည်။

ထိုသို့ တွေ့ဆုံစဉ် မြန်မာနိုင်ငံနှင့် ချုံချင့်မြို့အကြား ကဏ္ဍပေါင်းစုံ ပူးပေါင်းဆောင်ရွက်မှုများ ခိုင်မာစေရေးနှင့် ပိုမိုတိုးချဲ့ဆောင်ရွက်နိုင်ရေးတို့ကို ဆွေးနွေးခဲ့ကြကြောင်း သိရသည်။

ထို့ပြင် အစည်းအဝေးတွင် ကောင်စစ်ဝန်ချုပ်က မြန်မာနိုင်ငံနှင့် ချုံချင့်မြို့အကြား စီးပွားရေးနှင့် ရင်းနှီးမြှုပ်နှံမှုလုပ်ငန်းများ ပူးပေါင်းဆောင်ရွက်ရေး၊ ပညာရေး၊ စိုက်ပျိုးရေး၊ စွမ်းအင်ကဏ္ဍများတွင် ပူးပေါင်းဆောင်ရွက်မည့်ကိစ္စရပ်များနှင့် ပတ်သက်၍ ဆွေးနွေးခဲ့ကြောင်း သိရသည်။

ထိုသို့ ဆွေးနွေးရာ ဒုတိယညွှန်ကြားရေးမှူးချုပ်နှင့် တက်ရောက်လာသည့် ချုံချင့်မြူနီစီပယ်အစိုးရ ဌာနဆိုင်ရာ တာဝန်ရှိသူများမှ နှစ်ဖက်လက်ရှိ ပူးပေါင်းဆောင်ရွက်နေမှု အခြေအနေများနှင့် အခြား ပူးပေါင်း ဆောင်ရွက်နိုင်မည့်ကိစ္စရပ်များအား ပြန်လည်ရှင်းလင်း ဆွေးနွေးခဲ့ကြောင်း သိရသည်။