တောင်ကိုရီးယား အာဏာရပါတီမှ အမတ်များ သမ္မတကိုစွပ်စွဲပြစ်တင်မှု မဲခွဲဆုံးဖြတ်ခြင်းမတိုင်မီ လွှတ်တော်ခန်းမတွင်းမှ ထွက်ခွာကုန်ကြ
တောင်ကိုရီးယား သမ္မတ ယွန်ဆွတ်ယို၏ လက်ရှိအာဏာရပါတီမှ ပါလီမန်အမတ် အားလုံးနီးပါးသည် ယွန်ဆွတ်ယိုအား စွပ်စွဲပြစ်တင်ရန်အတွက် မဲခွဲဆုံးဖြတ်မှုမတိုင်ခင် လွှတ်တော်ခန်းမအတွင်းမှ ထွက်ခွာခဲ့ကြသဖြင့် အတိုက်အခံပါတီဖက်မှ အမတ်များချည်းသက်သက်ဖြင့် မဲခွဲရန်အခက်အခဲဖြစ်နေကြကြောင်း သိရသည်။
ယင်းအဆိုကို တင်သွင်းသည့် အတိုက်အခံ ဒီမိုကရက်တစ်ပါတီဖက်မှ အဆိုအောင်မြင်ရန်အတွက် လက်ရှိအာဏာရ PPP ပါတီထံမှ အနည်းဆုံး ရှစ်မဲ လိုအပ်သော်လည်း လွှတ်တော်ခန်းမအတွင်းဝယ် မစ္စတာယွန်၏ ပြည်သူ့အာဏာပါတီ (PPP)မှ အမတ်တစ်ဦးသာ ကျန်ရှိတော့သည်။
သို့ရာတွင် ကျန်ရှိနေသော အမတ်များကမူ စွပ်စွဲပြစ်တင်မှု အဆိုအတွက် လျှို့ဝှက်မဲများစတင်ပေးနေပြီဖြစ်သည်။ ယင်းမဲအရေအတွက်သည် အဆိုအောင်မြင်ရန်အတွက် လုံလောက်သည့် မဲရနိုင်မည် မရနိုင်မည်ဆိုသည်ကို ရှင်းလင်းစွာ မသိရသေးချေ။
အကယ်၍ ယနေ့တွင် မဲခွဲဆုံးဖြတ်မှုမအောင်မြင်ပါက လာမည့်ဗုဒ္ဓဟူးနေ့တွင် ပြန်လည်ပြုလုပ်ရန်စီစဉ်ထားကြောင်း အတိုက်အခံခေါင်းဆောင်များက ပြောသည်။
တောင်ကိုရီးယားသမ္မတ ယွန်ဆွတ်ယိုကလည်း သူအပေါ်စွပ်စွဲပြစ်တင်မှုအား လွှတ်တော်တွင်မဲခွဲဆုံးဖြတ်ရန် နာရီပိုင်းအလိုတွင် သူက အရေးပေါ် စစ်အုပ်ချုပ်ရေးအမိန့် ပြဌာန်းခဲ့မှုအတွက် ပြည်သူတစ်ရပ်လုံးသို့ တောင်းပန်ခဲ့သည်။
ဗုဒ္ဓဟူးနေ့က စစ်အုပ်ချုပ်ရေးအမိန့်ကို ရုပ်သိမ်းပြီးနောက် သူ၏ ပထမဆုံးမိန့်ခွန်းအဖြစ် ယနေ့နံနက်ပိုင်းက ရုပ်မြင်သံကြားမှ နှစ်မိနစ်ကြာ မိန့်ခွန်းပြောကြားရာတွင် ယွန် က သူ၏ဆုံးဖြတ်ချက်အတွက် အလွန်စိတ်မကောင်းဖြစ်မိကြောင်း ပြောကြားခဲ့ပြီး စစ်အုပ်ချုပ်ရေး ဒုတိယအကြိမ် ထပ်မံပြဌာန်းရန်လည်း ကြိုးပမ်းမည်မဟုတ်ကြောင်း ကတိပြုခဲ့သည်။
"ကျွန်တော့်ကြောင့် ထိတ်လန့်တုန်လှုပ်သွားရသူတွေကို လေးလေးနက်နက် တောင်းပန်ချင်ပါတယ်" ဟု ယွန်ကပြောပြီးဦးညွှတ်တောင်းပန်ခဲ့သည်။
