သားဖြစ်သူ ဟန်းတားအတွက် လွတ်ငြိမ်းချမ်းသာခွင့် ဘိုင်ဒန်လက်မှတ်ရေးထိုး
ဒီဇင်ဘာ ၂
အမေရိကန်သမ္မတဂျိုးဘိုင်ဒန်ဟာ ရာဇဝတ်မှုနှစ်ခုနဲ့ တရားစွဲဆိုခံထားရတဲ့ သားဖြစ်သူ ဟန်းတားအတွက် တရားဝင် လွတ်ငြိမ်းချမ်းသာခွင့်ကို လက်မှတ်ရေးထိုးအတည်ပြုလိုက်ပါတယ်။
သားဖြစ်သူ ဟန်းတားဟာ သီးသန့်ပစ်မှတ်ထားတိုက်ခိုက်ခံရပြီး ၎င်းမကျူးလွန်ခဲ့တဲ့ ပြစ်မှုအတွက် ပြစ်ဒဏ်ချမှတ်ခံခဲ့ ရတာဖြစ်ကြောင်း ဘိုင်ဒန်ရဲ့ထုတ်ပြန်ကြေညာချက်ထဲမှာ ဖော်ပြထားပါတယ်။
ဟန်းတားဘိုင်ဒန်ဟာ အခွန်ရှောင်မှုနဲ့ အပြစ်ရှိကြောင်း စက်တင်ဘာလအစောပိုင်းက ဝန်ခံခဲ့သလို တရားမဝင် မူးယစ် ဆေးဝါးသုံးစွဲမှု၊ သေနတ်တစ်လက်ပိုင်ဆိုင်ထားမှုတို့နဲ့ အပြစ်ရှိကြောင်း ဇွန်လအတွင်းက စစ်ဆေးတွေ့ရှိခဲ့ပါတယ်။
ဟန်းတားရဲ့ဖြစ်စဉ်ဟာ လက်ရှိအာဏာရသမ္မတတစ်ဦးရဲ့ သားသမီးတစ်ယောက်ကို တရားရုံးက အပြစ်ရှိတယ်လို့ ပထမဦးဆုံး ပြစ်ဒဏ်ချမှတ်ခံရတဲ့ ဖြစ်စဉ်ဖြစ်ပါတယ်။
လွတ်ငြိမ်းချမ်းသာခွင့်နဲ့ ပတ်သက်ပြီး ရွေးကောက်ပွဲနိုင် အကြိုသမ္မတဒေါ်နယ်ထရမ့်က တုံ့ပြန်ရာမှာ “ဂျိုးဘိုင်ဒန်က ဟန်းတားကို ပေးလိုက်တဲ့ လွတ်ငြိမ်းချမ်းသာခွင့်ထဲမှာ ဇန်နဝါရီလ ၆ ရက်နေ့က ဓားစာခံတွေအတွက်ရောပါသလား။ ဒါဟာ (အာဏာ) အလွဲသုံးစားမှုနဲ့ တရားရုံးရဲ့ မှားယွင်းတဲ့ဆုံးဖြတ်မှုလား။” လို့ ပြောပါတယ်။
သမ္မတဘိုင်ဒန်က ၎င်းသားကို ချမ်းသာခွင့်ပေးမှာမဟုတ်ကြောင်း အရင်က ပြောဆိုခဲ့ပြီးနောက်မှာ အခုလို ချွင်းချက်မရှိ လွတ်ငြိမ်းချမ်းသာခွင့် ထုတ်ပြန်ပေးလိုက်တာဖြစ်ပါတယ်။
သမ္မတဘိုင်ဒန်ဟာ သားဖြစ်သူအတွက် လွတ်ငြိမ်းချမ်းသာခွင့် ထုတ်ပြန်မှာမဟုတ်ကြောင်း စက်တင်ဘာလ ကလည်း အိမ်ဖြူတော်ပြန်ကြားရေးအရာရှိက ပြောကြားခဲ့ပါတယ်။
ဒါပေမဲ့ ဒီဇင်ဘာ ၁ ရက်နေ့ ညနေပိုင်းမှာတော့ “ဟန်းတားရဲ့အမှုကိစ္စမှာ နိုင်ငံရေးဘက်လိုက်မှုတွေ ရောယှက်ပါဝင် နေ သလို တရားရုံးဆုံးဖြတ်ချက်ဟာလည်း လွဲမှားနေတယ်လို့ ယုံကြည်ကြောင်း” ဘိုင်ဒန်က ပြောပါတယ်။
“သမ္မတတာဝန်စတင်ထမ်းဆောင်ချိန်ကစပြီး တရားရေးဝန်ကြီးဌာနရဲ့ ဆုံးဖြတ်ချက်တွေကို ဝင်ရောက် စွက်ဖက်ခြင်းမပြုဘူးလို့ ကျွန်ပြောဆိုခဲ့ပါတယ်။ ပြောထားတဲ့ကတိတည်ဖို့အတွက် ကျွန်တော့်သား မမျှမတ တရားစွဲဆိုခံနေရတာကို တောင် ကျွန်တော် ထိုင်ကြည့်နေခဲ့ပါတယ်။” လို့ ၎င်းက ပြောပါတယ်။
ဖခင်တစ်ဦးနဲ့ အမေရိကန်သမ္မတတစ်ဦးအနေနဲ့ ၎င်းရဲ့ဆုံးဖြတ်ချက်ကို အမေရိကန်ပြည်သူတွေ နားလည်နိုင်လိမ့်မယ်လို့ မျှော်လင့်ကြောင်း ဘိုင်ဒန်က ပြောပါတယ်။
အမေရိကန်သမ္မတတစ်ဦးက မိသားစုဝင်တစ်ဦးက လွတ်ငြိမ်းချမ်းသာခွင့်ပေးတဲ့ဖြစ်စဉ်မှာ အခုဖြစ်စဉ်ဟာ ပထမဦးဆုံး အကြိမ်ဖြစ်စဉ်တော့ မဟုတ်ပါဘူး။ အမေရိကန်သမ္မတဘီလ်ကလင်တန်ဟာ ၁၉၈၅ ခုနှစ် ကိုကင်းဆက်စပ်မှုနဲ့ တရားစွဲခံထားရတဲ့ ၎င်းရဲ့ အမေတူ ဖအေကွဲညီဖြစ်သူ ရော်ဂျာကလင်တန်ကို ၂၀၀၁ ခုနှစ်မှာ လွတ်ငြိမ်းချမ်းသာခွင့် ပေးခဲ့ပါတယ်။
Ref: Biden hopes Americans will understand son's pardon
#centralnewsnaypyitaw
