"မြန်မာကုန်သွယ်ရေးကြောင့် ထိုင်းဘတ်ငွေ ပြင်ပဈေးနှင့် ဗဟိုဘဏ်ဈေးတူညီလာ"
မြန်မာနိုင်ငံ၏ ကုန်သွယ်ရေးလုပ်ငန်းများတွင် အမေရိကန်ဒေါ်လာအစား ထိုင်းဘတ်ငွေ နှင့် တရုတ်ယွမ်ငွေများ ဈေးကွက်အတွင်း ဝင်ရောက်မှုများလာခြင်းကြောင့် ဗဟိုဘဏ်က ထိုင်းဘတ်ငွေဈေးကို တိုးမြင့်သတ်မှတ်လာခဲ့ရာ ပြင်ပပေါက်ဈေးဖြင့်တူညီလာကြောင်း သွင်းကုန်/ထုတ်ကုန်လုပ်ငန်းရှင်များထံမှ သိရသည်။
ပြင်ပငွေလဲဈေးကွက်တွင် ထိုင်းဘတ်ငွေတစ်ဘတ်လျှင် ၁၃၀ ကျပ် ပေါက်ဈေးရှိနေပြီး ဗဟိုဘဏ်မှ နိုဝင်ဘာ(၂၉) ရက်နေ့ အွန်လိုင်းပေါက်ဈေးအရ ထိုင်းငွေတစ်ဘတ်လျှင် ၁၂၉ကျပ် အထိ ပေါက်ဈေးဖြစ်ပေါ်နေခဲ့သည်။
“ကုန်သွယ်ရေးဘက်မှာ အမေရိကန်ဒေါ်လာ အသုံးပြုတာကျဆင်းလာတာကြောင့်လဲပါတယ်၊ မြန်မာငွေ နဲ့ ထိုင်းဘတ်၊ တရုတ်ယွမ်တွေ တိုက်ရိုက် ကုန်သွယ်မှုလည်းများလာတယ်။ ဒါပေမယ့် မြန်မာငွေတန်ဖိုးတက်လာတာ တော့ မဟုတ်ဘူး ငွေကြေးတန်ဖိုးကြုံသွားတာပါ။ သုံးလို့ရတဲ့နေရာရှားသွားတဲ့သဘောပါ” ဟု ပြင်ပငွေကြေး အရောင်းအဝယ်ဈေးကွက်အတွင်းမှ ကျွမ်းကျင်သူတစ်ဦးက ပြောသည်။
ငွေကြေးလဲလှယ်တဲ့ဈေးကွက်ထဲ၌ အမေရိကန်ဒေါ်လာ ဈေးကျခြင်းကြောင့် မြန်မာကျပ်ငွေတန်ဖိုးတက်လာသည် ဟု အများက ထင်နေကြသော်လည်း အလဲအလှယ်များသည့် ဘတ်နဲ့ ယွမ်ငွေများအကြားတွင် မြန်မာငွေတန်ဖိုးက ကျဆင်းနေကြောင်း သိရသည်။
"ဗဟိုဘဏ်က ဒေါ်လာကိုလည်း စက်တင်ဘာမှာ (၃၅၂၄) ကျပ် ဝန်းကျင်ကနေ အခု (၃၅၈၅) ကျပ် အထိ တက်ရောင်းပေမယ့် ဒေါ်လာကို အရမ်းတက်မရောင်းပါဘူး။ ဘတ်နဲ့ယွမ်ကို ဘာလို့ဈေးတင်ရောင်းလာလဲဆိုရင် စီးပွားရေးပိတ်ဆို့ခံရလို့ တချို့နိုင်ငံတွေကို ဒေါ်လာတိုက်ရိုက်ပေးချေလို့ မရတဲ့အခါ ဘတ်၊ ယွမ်၊ ရူပီး စတဲ့ ဘက်ကနေ အလွှဲအပြောင်း ပိုလုပ်ရတဲ့ပုံစံရှိပါတယ်။ လတ်တလော သွင်းကုန်တချို့အများဆုံးပေးချေနေရတာ ကလည်း ဘတ်နဲ့ ယွမ်များတာ တွေ့ရပါတယ်။ ဒီလိုပဲပြည်ပပို့ကုန်က ပြန်ငွေတဲ့ အဝင်မှာလည်း ဘတ်နဲ့ယွမ် ပိုများလာတယ်" ဟု နိုင်ငံခြားငွေကြေးလဲလှယ်ရောင်းဝယ်သူတစ်ဦးက ပြောသည်။
