ပြိုင်ဘက်မော်ရိုကို ဖိုက်တာခြေကန်ချက်ဖြင့် ဒုတိယအချီအတွင် အလဲထိုးခံရသည့် ထွန်းမင်းအောင်
ယနေ့ နိုဝင်ဘာ (၂၂) ရက် ညပိုင်းတွင် ONE က ပြုလုပ်မည့် ONE Friday Fights 88 ပွဲစဉ်တွင် ပြိုင်ဘက် မော်ရိုကို ဖိုက်တာ အက်ဘ်ဒယ်လာဇီဇာဟီဒီ၏ ခြေကန်ချက်ဖြင့် ရိုးရာဖိုက်တာ ထွန်းမင်းအောင်မှာ ဒုတိယအချီတွင်ပင် အလဲထိုးခံရကာ ရှုံးနိမ့်ခဲ့ရသည်။
ထွန်းမင်းအောင်မှာ ပထမအချီတွင်ပင် ပြိုင်ဘက် မော်ရိုကို ဖိုက်တာ၏ ခြေကန်ချက်၊ တံတောင်ရိုက်ချက်များအကြား အလူးအလဲခံနေရရာမှ ဒုတိယအချီ မိနစ်အနည်းအတွင်း ပြိုင်ဘက်၏ ခြေကန်ချက်ဖြင့် သတိလစ်မေ့မျောသည်အထိ ဖြစ်ပွားခဲ့ရခြင်းဖြစ်သည်။
အသက် (၂၅)နှစ်အရွယ် မော်ရိုကိုဖိုက်တာ အက်ဘ်ဒယ်လာဇီဇာဟီဒီသည် အရပ် (၅) ပေ (၁၁) လက်မရှိပြီး၊ မွေထိုင်းပွဲ (၃၄) ပွဲ ထိုးသ-တ်ထားသည့်အနက် ပွဲ (၃၀) အနိုင်ရထားပြီး (၄) ပွဲ ရှုံးနိမ့်ထားသူဖြစ်ကာ ချန်ပီယံဆု (၇) ဆုကို ဆွတ်ခူးပိုင်ဆိုင်ထားသူဖြစ်သည်ဟု သိရသည်။
အသက် (၁၉) နှစ်အရွယ် ရိုးရာဖိုက်တာ ထွန်းမင်းအောင် သည် ONE ကပြုလုပ်သည့် ပွဲစဉ်တွင် ယခုပွဲစဉ်အပါအဝင် ၄ ပွဲထိုးသ-တ်ခဲ့ပြီးဖြစ်ကာ (၂) ပွဲနိုင် (၂) ပွဲရှုံး ရလာဒ်ကို ပိုင် ဆိုင်ထားသူဖြစ်သည်။
