မြောက်ကိုရီးယားအတွက် ရေနံစည်ပေါင်း တသန်းကျော် ရုရှားထောက်ပံ့

နိုဝင်ဘာ ၂၂

ရုရှားဟာ ပြီးခဲ့တဲ့မတ်လကတည်းက မြောက်ကိုရီးယားအတွက် ရေနံစည်ပေါင်း တသန်းကျော် ထောက်ပံ့ပေးခဲ့ကြောင်း ဗြိတိန်အခြေစိုက် Open Source Centre ရဲ့ ဂြိုဟ်တုဓါတ်ပုံဆန်းစစ်ချက် အစီရင်ခံစာမှာ ဖော်ပြထားပါတယ်။

အဲဒီနေရေနံတွေကို ရုရှားအတွက် လက်နက်တွေထောက်ပံ့တာနဲ့ မြောက်ကိုရီးယားတပ်ဖွဲ့တွေ စေလွှတ်ပေးတာအတွက် အပြန်အလှန်အားဖြင့် ပေးအပ်ခဲ့တာလို့ ဗြိတိန်နိုင်ငံခြားရေးဝန်ကြီး ဒေးဗစ်လမ်မီကလည်း ပြောပါတယ်။

မြောက်ကိုရီးယား ရေနံတင်သင်္ဘော တဒါဇင်ကျော်ဟာ ရုရှားနိုင်ငံအရှေ့ဖျားပိုင်းရှိ ရေနံဆိပ်ကမ်းတခုကို လွန်ခဲ့တဲ့ရှစ်လအတွင်း ၄၃ ကြိမ်ထိ ဆိုက်ကပ်ခဲ့ပြီး သင်္ဘောတွေဟာ အပြန်မှာတော့ ဆီအပြည့်တင်ဆောင်ပြီး ထွက်ခွာသွားကြတယ်လို့ ဂြိုဟ်တုဓါတ်ပုံမှတ်တမ်းတွေမှာ ဖော်ပြထားပါတယ်။

ပထမဆုံး ရေနံလွှဲပြောင်းမှုကိုတော့ မြောက်ကိုရီးယားက ရုရှားအတွက် လက်နက်ခဲယမ်းမီးကျောက်တွေ ပထမဆုံးအကြိမ် ပေးပို့မှုကို ဒီနှစ်မတ်လ ၇ ရက်မှာ စတင်ခဲ့တယ်လို့ အစီရင်ခံစာကဆိုပါတယ်။ မြောက်ကိုရီးယားတပ်ဖွဲ့ဝင် ထောင်ပေါင်းများစွာကို ယူကရိန်းစစ်ပွဲအတွက် စေလွှတ်မှုတွေရှိကြောင်း သတင်းတွေထွက်နေချိန်မှာ ရေနံလွှဲပြောင်းမှုတွေကို ဆက်တိုက်လုပ်ဆောင်ခဲ့ပြီး နောက်ဆုံးအကြိမ်ကတော့ နိုဝင်ဘာ ၅ ရက်နေ့ဖြစ်တယ်လို့ ပြောပါတယ်။

မြောက်ကိုရီးယားဟာ ကမ္ဘာ့ရေနံစျေးကွက်မှာ ရေနံဝယ်ယူခွင့်မရှိတဲ့ တခုတည်းသောနိုင်ငံဖြစ်ပါတယ်။ သူ့ရဲ့ နျူကလီးယားအစီအစဉ်ကို ကန့်သတ်ဖို့အတွက် နှစ်စဉ်ရေနံစည် ငါးသိန်းသာ ကုလသမဂ္ဂက ကန့်သတ်ထားပါတယ်။ ရုရှားရဲ့ ရေနံလွှဲပြောင်းမှုတွေဟာ ကုလသမဂ္ဂက ချမှတ်ထားတဲ့ အရေးယူပိတ်ဆို့မှုတွေကို ချိုးဖောက်တာလို့ အမေရိကန်က ဝေဖန်ပါတယ်။

Ref:BBC
Photo:Planet Labs

#centralnewsnaypyitaw