စစ်ပွဲအတွက် အသင့်ပြင်ဆင်ထားဖို့ ဆွီဒင်နဲ့ ဖင်လန် ၎င်းတို့ နိုင်ငံသားတွေကို တိုက်တွန်း
နိုဝင်ဘာ ၂၀
ယူကရိန်းစစ်ပွဲ အရှိန်မြင့်လာစဉ်အတွင်း စစ်ပွဲအတွက် ဘယ်လိုပြင်ဆင်ရမယ်ဆိုတာကို နိုင်ငံသားတွေကို အကြံ ပြုထားတဲ့ လက်ကမ်းစာစောင် သန်းနဲ့ချီပြီး ဆွီဒင်နိုင်ငံက တနင်္လာနေ့ (နိုဝင်ဘာ ၁၈ ရက်နေ့) က စတင် ဖြန့် ဝေခဲ့သလို ဖင်လန်နို်င်ငံကလည်း ဝက်ဆိုက်အသစ်တစ်ခုကို ဖွင့်လှစ်လိုက်ပါတယ်။
နှစ်ပေါင်းများစွာ ဘက်မလိုက်နိုင်ငံအဖြစ်ရပ်တည်ခဲ့ကြတဲ့ နော်ဒစ်အိမ်နီးချင်းနှစ်နိုင်ငံဟာ ၂၀၂၂ ခုနှစ်မှာ ရုရှား က ယူကရိန်းကို ကျူးကျော်တိုက်ခိုက်ပြိးနောက် အမေရိကန်ဦးဆောင်တဲ့ နေတိုးအဖွဲ့ထဲဝင်ရောက်ခဲ့ကြပါတယ်။
“လုံခြုံရေးအခြေအနေက အလွန်အရေးကြီးတဲ့အတွက် အကျပ်အတည်းမျိုးစုံနဲ့ နောက်ဆုံးမှာ စစ်ပွဲကိုရင်ဆိုင်ဖို့ အတွက် ကျွန်တော်တို့ရဲ့ ကာကွယ်ရေးစွမ်းရည်တွေကို မြှင့်တင်ဖို့လိုအပ်ပါတယ်။” လို့ ဆွီဒင်မြို့ပြအရေးပေါ် ကာကွယ်ရေးအေဂျင်စီရဲ့ ညွှန်ကြားရေးမှူး မိုက်ကယ်ဖရီဆယ်က ပြောပါတယ်။
ယူကရိန်းစစ်ပွဲစတင်ကတည်းက ဖြစ်လာနိုင်ခြေရှိတဲ့ စစ်ပွဲအတွက် စိတ်ပိုင်းဆိုင်ရာ လော်ဂျစ်စတစ်ပိုင်းဆိုင်ရာ အားလုံး ပြင်ဆင်ထားဖို့ ဆွီဒင်နိုင်ငံသားတွေကို ဆွီဒင်အစိုးရက တိုက်တွန်းခဲ့ပါတယ်။
စစ်အေးကာလပြီးဆုံးကတည်းက ဆွီဒင်နိုင်ငံဟာ ၎င်းတို့နိုင်ငံရဲ့ ကာကွယ်ရေးအသုံးစရိတ်တွေကို သိသိသာ သာ လျှော့ချခဲ့ပေမဲ့ ၂၀၁၄ ခုနှစ်မှာ ရုရှားက ယူကရိန်းနိုင်ငံရဲ့ ခရိုင်းမီးယားကျွန်းဆွယ်ကို ဝင်ရောက်သိမ်းပိုက် လိုက်တဲ့အချိန်မှာ ကာကွယ်ရေးအသုံးစရိတ်ကို ပြန်လည်မြှင့်တင်ခဲ့ပါတယ်။
အဲဒီအချိန်ကစပြီး ဆွီဒင်နိုင်ငံဟာ ကန့်သတ်ထားတဲ့ စစ်မှုထမ်းဥပဒေကို ပြန်လည်အသက်သွင်းလာခဲ့သလို ကာ ကွယ်ရေးအသုံးစရိတ်မြှသင့်တင်ပြီး ဘော်လတစ်ပင်လယ်ထဲက Gotland ကျွန်းပေါ်မှာရှိတဲ့ ခံတပ်စခန်းကို လည်း ပြန်လည်ဖွင့်လှစ်ခဲ့ပါတယ်။
ဆွီဒင်နိုင်ငံဟာ နိုင်ငံသားတွေအတွက် ဗုံးခိုကျင်းတွေ ထပ်မံတိုးချဲ့တည်ဆောက်ခဲ့ပြီး သောက်ရေတွေ၊ သယ် ယူပို့ဆောင်ရေးအခြေခံအဆောက်အအုံတွေထောက်ပံ့ခဲ့သလို မြို့ပြကာကွယ်ရေးဝန်ကြီးတစ်ဦးကိုလည်း ခန့် အပ်ခဲ့ပါတယ်။
ဒါ့အပြင် လုပ်ကြံသတင်းတွေကို တိုက်ဖျက်ဖို့ ရည်ရွယ်ပြီး စိတ်ဓာတ်စစ်ဆင်ရေးအေဂျင်စီတစ်ခုကိုလည်း တည် ထောင်ခဲ့ပါတယ်။
တနင်္လာနေ့က စတင်ဖြန့်ဝေနေတဲ့ စာမျက်နှာ ၃၂ မျက်နှာပါ “အကျပ်အတည်း သို့မဟုတ် စစ်ဖြစ်လာခဲ့သော်” အမည်ရလက်ကမ်းစာအုပ်ငယ်လေးထဲမှာ စစ်ပွဲ၊ သဘာဝဘေးအန္တရာယ်၊ ဆိုက်ဘာတိုက်ခိုက်မှုနဲ့ အကြမ်းဖက် တိုက်ခိုက်မှုတွေအတွက် ဘယ်လိုပြင်ဆင်ရမလဲဆိုတဲ့ သတင်းအချက်အလက်တွေကို ဖော်ပြထားပါတယ်။
လာမယ့် ၂ ပတ်အတွင်း အိမ်ထောင်စု ၅.၂ သန်းကို ဖြန့်ဝေမယ့် အဲဒီစာအုပ်ငယ်ဟာ ဒုတိယကမ္ဘာစစ်အပြီး ဆွီဒင်နိုင်ငံက ငါးကြိမ်ထုတ်ဝေခဲ့တဲ့ စာအုပ်ငယ်တွေထဲမှာ ခေတ်အမီဆုံးစာအုပ်ငယ်ဖြစ်ပါတယ်။
အခုထုတ်ဝေလိုက်တဲ့ လက်ကမ်းစာအုပ်ငယ်ထဲမှာ ရုရှား၊ ယူကရိန်း၊ ဒါမှမဟုတ် တခြားနိုင်ငံတစ်ခုခုကို နာမည် တပ်ပြီး ထည့်သွင်းဖော်ပြထားခြင်း မရှိပါဘူး။
ဆွီဒင်ကာကွယ်ရေးဝန်ကြီး ကားလ်အော်စကာဘိုလင်းက “ဆွီဒင်နိုင်ငံမှာ စစ်ပွဲဖြစ်ပွားလာနိုင်ကြောင်း” ဇန်နဝါ ရီလက သတိပေးခဲ့သလို အဲဒီအချိန်က ဆွီဒင်ကြည်းတပ်အကြီးအကဲ မိုက်ကယ်ဘိုင်ဒန်ကလည်း “ဆွီဒင်နိုင်ငံ ဟာ စစ်ပွဲအတွက် ပြင်ဆင်ထားရမှာဖြစ်ကြောင်း” ပြောဆိုခဲ့ပါတယ်။
ဆွီဒင်နိုင်ငံဟာ နှစ်ပေါင်း ၂၀၀ ကျော် စစ်ပွဲနဲ့ မထိတွေ့ဖူးတဲ့ နိုင်ငံဖြစ်ပါတယ်။
တပြိုင်တည်းမှာပဲ ဖင်လန်နိုင်ငံကလည်း အကျပ်အတည်းမျိုးစုံအတွက် ကြိုတင်ပြင်ဆင်ရေးနဲ့ ပတ်သက်ပြီး သတင်းအချက်အလက်တွေ ရှာဖွေစုဆောင်းတဲ့ ဝက်ဆိုက်တစ်ခုကို ဖွင့်လှစ်လိုက်ပါတယ်။
ရုရှားနိုင်ငံနဲ့ မိုင် ၈၃၀ (ကီလိုမီတာ ၁၃၄၀) နယ်နိမိတ်ထိစပ်နေတဲ့ ဖင်လန်နိုင်ငံဟာ စစ်ပွဲအတွက် တပ်အသင့် အနေအထားကို အဆင့်မြှင့်တပ်လှန့်ထားပါတယ်။
ရုရှားက ယူကရိန်းကို ကျူးကျော်တိုက်ခိုက်တဲ့အချိန်မှာတော့ ဖင်လန်နိုင်ငံဟာ ဖင်လန်-ရုရှား နယ်စပ်မှာ ကီလို မီတာ ၂၀၀ ရှည်လျားတဲ့ ခြံစည်းရိုးတည်ဆောက်သွားမှာဖြစ်ကြောင်း ကြေညာခဲ့ပါတယ်။
၁၀ ပေ အမြင့်ရှိတဲ့ အဲဒီခြံစည်းရိုးမှာ သံဆူးကြိုးခွေတွေ တပ်ဆင်သွားမှာဖြစ်ပြီး ၂၀၂၆ ခုနှစ်မှာ အပြီးတည် ဆောက်သွားဖို့ စီစဉ်ထားပါတယ်။
Ref: Sweden, Finland Urge Residents to Be Ready for War
Credit - MI News
#သတင်းဟင်းလေးအိုးကြီး
