ရုရှားပိုင်နက်ကို တာဝေးပစ်ဒုံးကျည်တွေနဲ့ တိုက်ရင် ထင်သာမြင်သာ တုံ့ပြန်မယ်လို့ သတိပေး
နိုဝင်ဘာ ၁၉
အမေရိကန်ရဲ့ တာဝေးပစ်ဒုံးကျည်တွေကို ယူကရိန်းအတွက်အသုံးပြုခွင့်ပေးလိုက်တာကြောင့် ထင်သာမြင်သာ တုံ့ပြန်မှုနဲ့ ရင်ဆိုင်ရမယ်လို့ ရုရှားက သတိပေးလိုက်ပါတယ်။
ရုရှားပိုင်နက်ထဲထိ ဒီတာဝေးပစ်ဒုံးကျည်တွေနဲ့ တိုက်ခိုက်လာပြီဆိုရင် အမေရိကန်နဲ့ မဟာမိတ်တွေ ယူကရိန်းစစ်ပွဲမှာ တိုက်ရိုက်ပါဝင်ပတ်သက်တာလို့ ရုရှားနိုင်ငံခြားရေးဝန်ကြီးဌာနက သတိပေးထုတ်ပြန်ပါတယ်။
အမေရိကန်သမ္မတဂျိုးဘိုင်ဒင်ဟာ အိမ်ဖြူတော်က ထွက်ခွာဖို့ နှစ်လအလိုမှာ အမေရိကန်ရဲ့မူဝါဒကို ကြီးကြီးမားမား ပြောင်းလဲမှုအဖြစ် ရုရှားနိုင်ငံထဲကပစ်မှတ်တွေကို တိုက်ခိုက်ဖို့ တာဝေးပစ်ဒုံးကျည်တွေအသုံးပြုတိုက်ခိုက်ခွင့်ကို ပေးခဲ့ပါတယ်။
ယူကရိန်းစစ်ပွဲအဆုံးသတ်မယ်လို့ ကတိပြုထားတဲ့ ရွေးကောက်ခံသမ္မတ ဒေါ်နယ်ထရန့်နဲ့ ဒီကိစ္စကို တိုင်ပင်ခဲ့ခြင်းရှိမရှိတော့ ရှင်းရှင်းလင်းမသိရသေးပါဘူး။ အကွာအဝေး မိုင် ၁၉၀ လောက်ထိ ပစ်ခတ်နိုင်တဲ့ ATACMS ဒုံးကျည်တွေနဲ့ ပြင်သစ် ဗြိတိန်တို့ရဲ့ အလားတူဒုံးကျည်တွေ ယူကရိန်းကို ထောက်ပံ့ပေးထားပေမယ့် ရုရှားပိုင်နက်ထဲကို တိုက်ခိုက်ဖို့ကိုတော့ တားမြစ်ထားပါတယ်။
တားမြစ်ထားတာကို ရုပ်သိမ်းလိုက်တဲ့ အမေရိကန်သမ္မတဂျိုးဘိုင်ဒင်ရဲ့ ဆုံးဖြတ်ချက်ဟာ ၂၀၂၂ ခုနှစ် ဖေဖော်ဝါရီ ၂၄ ရက်မှာ စတင်ခဲ့တဲ့ ယူကရိန်းစစ်ပွဲ ရက် ၁၀၀၀ ပြည့်နဲ့လည်း တိုက်ဆိုင်နေပါတယ်။ ပူတင်ကတော့ ဒီကိစ္စနဲ့ပတ်သက်ပြီး နှုတ်ဆိတ်နေဆဲဖြစ်ပါတယ်။
ဒါပေမယ့်လည်း သူ့ရဲ့ ပြောရေးဆိုခွင့်ရှိသူကတော့ ယူကရိန်းစစ်ပွဲအရေးမှာ အမေရိကန်က မီးပုံထဲ ဆီလောင်းထည့်နေတယ်လို့ ဝေဖန်ပြောဆိုထားပါတယ်။ ဒါဟာ ရုရှားက မြောက်ကိုရီးယားစစ်သားတွေကို ခေါ်ယူအသုံးပြုနေတဲ့အပေါ် အမေရိကန်ရဲ့ တုံ့ပြန်မှုဖြစ်တယ်လို့ စောင့်ကြည့်လေ့လာသူအချို့ကလည်း သုံးသပ်ထားပါတယ်။
Ref:BBC
Photo:Getty Images
#centralnewsnaypyitaw
