မြန်မာစီးပွားရေးသမားတွေအတွက် လန်ချန်း-မဲခေါင်ဗီဇာ တရုတ်ထုတ်ပေးမည်
နိုဝင်ဘာ ၁၉
မြန်မာနိုင်ငံက စီးပွားရေးလုပ်ငန်းရှင်တွေနဲ့ သူတို့ရဲ့ မိသားစုဝင်တွေကို တရုတ်နိုင်ငံမှာ ခြောက်လ အထိ နေထိုင်နိုင်မဲ့ “လန်ချန်း-မဲခေါင် ဗီဇာ”ကို နိုဝင်ဘာ ၁၈ ရက်နေ့ကစပြီး ထုတ်ပေးမယ်လို့ မြန်မာနိုင်ငံဆိုင်ရာ တရုတ်သံရုံးက ကြေညာထားပါတယ်။ တရုတ်နိုင်ငံကို အကြိမ်ကြိမ် ဝင်ရောက်နိုင်မယ့်ဗီဇာမျိုးလည်း ဖြစ်ပါတယ်။
အဲဒီဗီဇာဟာ ငါးနှစ်သက်တမ်း ရှိမှာဖြစ်ပြီး တရုတ်နိုင်ငံကို အကြိမ်များစွာ လာရောက်နိုင်တဲ့ (Multiple Entry) အမျိုးအစားဖြစ်ပါတယ်။ ဒီကနေ့ကနေစတင် လျှောက်ထားနိုင်တာဖြစ်ပါတယ်။ တရုတ်သံရုံး ထုတ်ပြန်ချက်မှာတော့ဗီဇာ လျှောက်ထားရာမှာ လိုအပ်ချက်နဲ့ကိုက်ညီတဲ့ မြန်မာ စီးပွားရေးလုပ်ငန်းရှင်တွေ၊ သူတို့ရဲ့ မိသားစုဝင်တွေသာ လျှောက်ထားနိုင်တယ်လို့ မြန်မာနိုင်ငံဆိုင်ရာ တရုတ်သံရုံးက ဆိုထားပါတယ်။ အသေးစိတ်ကိုတော့ပြောဆိုထားတာမရှိပါဘူး။
ဗိုလ်ချုပ်မှုးကြီးမင်းအောင်လှိုင် တရုတ်ခရီးစဉ်အပြီးမှာ ဒီဗီဇာကို စတင်မိတ်ဆက်လာတာလည်း ဖြစ်ပါတယ်။ ပြီးခဲ့တဲ့ရက်ပိုင်းကဘဲ စစ်ခေါင်းဆောင် ဟာ တရုတ်ပြည်ဖိတ်ကြားချက်အရ လန်ချန်း မဲခေါင် အစည်းအဝေးအပြင် တခြားအစည်းအဝေးတွေပါ တက်ရောက်ခဲ့တာဖြစ်ပါတယ်။ အဲဒီခရီးစဉ်ဟာ အောင်မြင်ခဲ့တဲ့ ခရီးစဉ်တခုဖြစ်တယ်လို့ ပြောဆိုထုတ်ပြန်ထားပါတယ်။
တရုတ်ဝန်ကြီးချုပ် လီချန်းက ဒေသတွင်း ပူးပေါင်းဆောင်ရွက်မှုအဖြစ် “လန်ချန်း-မဲခေါင် ဗီဇာ”ကို ထုတ်ပေးမယ်လို့ မဟာမဲခေါင်ဒေသခွဲ စီးပွားရေး ပူးပေါင်းဆောင်ရွက်မှု ရှစ်ကြိမ်မြောက် အစည်းအဝေးမှာ ကြေညာခဲ့ပြီးခုလို ဗီဇာပေးလာတာဖြစ်ပါတယ်။
ဗီဇာလျှောက်ထားလိုသူတွေဟာ တရုတ်နိုင်ငံဘက်က ကုမ္ပဏီ တခုခု ဒါမှမဟုတ် အစိုးရအဖွဲ့တခုခုနဲ့ပူးတွဲ စီးပွားရေးလုပ်ငန်းလုပ်ကိုင်နေသူ ဖြစ်ဖို့လိုအပ်ပါတယ်။ လျှောက်ထားလိုသူတွေအတွက် တရုတ်နိုင်ငံဘက်က ကုမ္ပဏီ တခုခုဒါမှမဟုတ် အစိုးရအဖွဲ့တခုခုက သီးခြား ထောက်ခံပေးရမှာဖြစ်ပြီး အဲလိုထောက်ခံချက်ရသူမှာသာလျှောက်ထားခွင့်ပြုမှာဖြစ်ပါတယ်။
တခြားကတော့ တရုတ်သံရုံးကပေးတဲ့ ၁နှစ်နေထိုင်ခွင့် စီးပွားရေးဗီဇာ လျှောက်ထားတဲ့ အခါတင်ပြရတဲ့အချက်အလက်တွေ အတိုင်းတင်ပြရတယ်လို့ သိရပါတယ်။
တရုတ်နိုင်ငံက မြန်မာနိုင်ငံသားတွေကို အလည်ဗီဇာ၊ ကျောင်းသားဗီဇာ၊ စီးပွားရေးဗီဇာ၊ ဂျာနယ်လစ်ဗီဇာ ၂မျိုး စတဲ့ ဗီဇာအမျိုးအစား ၁၆မျိုးပေးတာရှိပြီး အခုဗီဇာနဲ့ဆို အမျိုးအစား ၁၇ မျိုးပေးဖို့ ပြင်ဆင်လာတာဖြစ်ပါတယ်။
လုံခြုံရေးအရ အမည်မဖော်လိုတဲ့ စီးပွားရေးလေ့လာသုံးသပ်သူ တစ်ဦးကတော့ တရုတ်ဘက်က မြန်မာနဲ့ စီးပွားရေးကဏ္ဍ ပိုပြီးတိုးမြင့်စေချင်တာအပြင်၊ သူတို့ နိုင်ငံဘက်ကမဖွံဖြိုးသေးတဲ့နေရာတွေမှာ စီးပွားရေးအခွင့်အလမ်းပွင့်လာစေဖို့ လုပ်ဆောင်တာဖြစ်မယ်လို့ သူကသုံးသပ်ပါတယ်။
“အထူးသဖြင့် မြန်မာနိုင်ငံနဲ့ကပ်လျက် တိုးတက်မှုနိမ့်တဲ့ တရုတ်ပြည်သူတွေအတွက် မြန်မာပြည်နဲ့စီးပွားရေးလုပ်ဖို့က သူတို့အတွက်အရေးကြီးတယ်။ ဗီဇာပေးတာ မှာတခုသတိထားဖို့က လိုအပ်ချက်နဲ့ကိုက်ညီသောဆိုတာပါတယ် ဒါကမရှင်းလင်းဘူး လန်ချန်းမဲခေါင်ဗီဇာပေးတယ်ဆိုတာက သူတို့ဘက်ကလည်းဒီလိုဗီဇာ ရချင်တာလည်းဖြစ်နိုင်တယ်။ ဆိုလိုတာက အသားလိုလို့အရိုးပေးတာ။ တဖက်ကလည်း နစကခေါင်းဆောင်သွားတဲ့အခါ စီးပွားရေးလုပ်ဖို့ပြောတဲ့အပေါ်တုံ့ပြန် တာလည်းရှိမှာပေါ့ လိုအပ်ချက်ကတော့ ဒီဘက်ကပိုလိုတယ်လေ။ တနိုင်ငံလုံးနဲ့ချီလိုတာပေါ့ ဟိုဘက်ကတော့တရုတ်နိုင်ငံတောင်ပိုင်းအတွက်ပေါ့ နယ်စပ်အပါ အဝင်စီးပွားရေးအရဆက်စပ်မှုပေါ့ ဒါလဲဖြစ်နိုင်ပါတယ်။”
“လန်ချန်း-မဲခေါင် ဗီဇာ” ဟာ မြန်မာ အပါအဝင် လာအို၊ ဗီယက်နမ်၊ ကမ္ဘောဒီးယား၊ ထိုင်း တို့လည်း ပေးသွားမှာဖြစ်ပါတယ်။
📷 မဟာမဲခေါင်ဒေသခွဲ စီးပွားရေး ပူးပေါင်းဆောင်ရွက်မှု ၈ ကြိမ်မြောက် ခေါင်းဆောင်များအစည်းအဝေးမှတ်တမ်းပုံ (နိုဝင်ဘာ ၆၊ ၂၀၂၄)
Credit - Voice of America
#သတင်းဟင်းလေးအိုးကြီး
