ပြည်တွင်းရွှေဈေး ကျပ် သိန်း ၆၀ အောက် ရောက်ရှိ
နိုဝင်ဘာ ၁၈
ပြည်တွင်းက ပြင်ပရွှေဈေးကွက်မှာ မနေ့ နိုဝင်ဘာ ၁၇ ရက်ကစလို့ အခေါက်ရွှေ တကျပ်သား ကျပ် သိန်း ၆၀ အောက်အထိ ကျဆင်းလာတယ်လို့ ရွှေလုပ်ငန်းရှင်တွေဆီက သိရပါတယ်။
ပြီးခဲ့တဲ့ စက်တင်ဘာလ ၁၁ ရက်နေ့ကစလို့ ကျပ် သိန်း ၆၀ ကျော် ဝန်းကျင်မှာ တောက်လျှောက် ရှိနေခဲ့တဲ့ ပြင်ပဈေးကွက်က အခေါက်ရွှေဈေးဟာ နှစ်လကျော်ကြာ မနေ့ နိုဝင်ဘာ ၁၇ ရက်၊ နေ့လယ်ပိုင်းမှာတော့ ကျပ် ငါးဆယ့်ကိုးသိန်း ကိုးသောင်းဝန်းကျင်ကို စတင်ကျဆင်း ရောက်ရှိလာတာ ဖြစ်ပါတယ်။
ဒီကနေ့ နိုဝင်ဘာ ၁၈ ရက်၊ မနက်ပိုင်းမှာတော့ ကျပ် ငါးဆယ့်ကိုးသိန်း ခုနစ်သောင်းဝန်းကျင်နဲ့ ဈေးဖွင့်ခဲ့ပြီး နေ့လယ်ပိုင်းမှာတော့ ကျပ် ငါးဆယ့်ကိုးသိန်း ခြောက်သောင်းခွဲဝန်းကျင်ကို ရောက်ရှိနေကာ တရက်အတွင်း နှစ်သောင်းခွဲဝန်းကျင် ကျဆင်းလာတာ ဖြစ်ပါတယ်။
အခုလို ပြည်တွင်းရွှေဈေးနှုန်း ကျဆင်းလာတာနဲ့ ပတ်သက်လို့ ရွှေလုပ်ငန်းရှင် တယောက်က “ရွှေဈေးကတော့ တအိအိနဲ့ ဆင်းနေပါတယ်။ အရောင်းအဝယ်တွေလည်း ပါးပါတယ်။ အဓိက ကတော့ ဒေါ်လာဈေးတွေအေးတယ်။ ကမ္ဘာ့ရွှေဈေးတွေ အေးတယ်။ ဒီနှစ်ခု အဓိက အချက်ပါပဲ။ ဒီအချက်တွေကြောင့် ပြည်တွင်းရွှေဈေးက ပြန်အေးသွားတယ်ပေါ့နော်။ ဒေါ်လာဈေးကို ဒီလိုပဲ တောက်လျှောက် အေးနေအောင်၊ ပြန်မတက်အောင် ထိန်းထားမယ်ဆိုရင်တော့လည်း ဈေးက ဆက်အေးသွားမယ်ပေါ့။ လောလောဆယ် အနေအထားကတော့ သိန်း ၆၀ ဝန်းကျင်မှာပဲ ငြိမ်နေမယ်လို့ ထင်ပါတယ်။ သိပ်အများကြီး အတက်အကျမဖြစ်လောက်ဘူး ထင်ပါတယ်” လို့ ပြောပါတယ်။
ပြည်တွင်းရွှေဈေးဟာ ပြီးခဲ့တဲ့ နှစ်လကျော်ကာလအတွင်း အမြင့်ဆုံးဈေး ၆၉ သိန်းဝန်းကျင်အထိ ရှိခဲ့ပြီး အနိမ့်ဆုံးဈေးကတော့ ၆၁ သိန်းခွဲအထိ ရှိခဲ့တာဖြစ်ပါတယ်။
“ရွှေဈေးက ၆၀ အောက် ဆင်းသင့်နေတာ ကြာပြီ။ ဒါပေမယ့် ဈေးကစားပြီး အတင်းဆွဲတင်ထားကြတော့ သိန်း ၆၀ အောက်ရောက်ဖို့ တဝဲလည်လည်နဲ့ ဖြစ်နေခဲ့တာပေါ့။ ဒါပေမယ့် နောက်ဆုံးတော့လည်း မကျမဖြစ် ကျလာရတာပါပဲ။ ဒေါ်လာဈေးလည်း ကျတယ်၊ ကမ္ဘာ့ရွှေဈေးကလည်း ထိုးကျနေတော့ ပြည်တွင်းရွှေဈေးက လက်ရှိ ဈေးတန်းကနေ ဆက်ကျနိုင်တယ်လို့ ယူဆပါတယ်။ အဝယ်သမားတွေအတွက်ကတော့ ဒီအချိန်က ဝယ်သင့်တဲ့အချိန်ပါ” လို့ ရွှေကုန်သည်တယောက်က ပြောပါတယ်။
အမေရိကန်ဒေါ်လာဈေးဟာ ပြီးခဲ့တဲ့ အောက်တိုဘာလ ၃၀ ရက်၊ ညနေပိုင်းကစလို့ တဒေါ်လာ ၄၅၈၀ ဝန်းကျင်ကို ရောက်ရှိလာတာဖြစ်ပြီး အဲဒီမတိုင်ခင်က တဒေါ်လာ ၄၆၀၀ ကျော်၊ ၄၇၀၀ ကျော် ဝန်းကျင်မှာ ရှိနေခဲ့တာဖြစ်ပါတယ်။
မနေ့ နိုဝင်ဘာ ၁၇ ရက်နေ့၊ မနက်ပိုင်းမှာတော့ တဒေါ်လာ ၄၄၈၀ ဝန်းကျင်ကို ထပ်မံကျဆင်း ရောက်ရှိလာကာ ဒီကနေ့ နိုဝင်ဘာ ၁၈ ရက်၊ မနက်ပိုင်းမှာတော့ ၄၄၅၀ ဝန်းကျင်နဲ့ ဈေးဖွင့်ထားပါတယ်။
ပြီးခဲ့တဲ့ အောက်တိုဘာ ၁၇ ရက်၊ ညနေပိုင်းကစလို့ တအောင်စ ၂၇၂၁ ဒေါ်လာကို မြင့်တက် ရောက်ရှိခဲ့တဲ့ ကမ္ဘာ့ရွှေဈေးကတော့ နိုဝင်ဘာ ၆ ရက်၊ ညနေပိုင်းကစလို့ တအောင်စ ၂၆၉၈ ဒေါ်လာကို ပြောင်းလဲရောက်ရှိ ကျဆင်းလာပါတယ်။
နိုဝင်ဘာ ၁၄ ရက်နေ့၊ မနက်ပိုင်းမှာတော့ ကမ္ဘာ့ရွှေဈေးကို တအောင်စ ၂၅၆၆ ဒေါ်လာနဲ့ ဈေးဖွင့်ခဲ့ပြီး ထပ်မံ ကျဆင်းလာကာ ဒီကနေ့ နိုဝင်ဘာ ၁၈ ရက်နေ့မှာတော့ တအောင်စ ၂၅၉၂ ဒေါ်လာနဲ့ ဈေးဖွင့်ထားပါတယ်။
Photo:CJ
Credit - Myanmar News Network
#သတင်းဟင်းလေးအိုးကြီး
