ဘင်္ဂလားဒေ့ရှ်တွင် သွေးလွန်တုပ်ကွေးဖြင့် ေ-သဆုံးသူ ၄၀၀ ကျော်လာ
အပူချိန် မြင့်တက်ခြင်း၊ မိုးရာသီကာလရှည်ကြာခြင်းတို့ကြောင့် ဘင်္ဂလားဒေ့ရှ်နိုင်ငံတွင် သွေးလွန်တုပ်ကွေးရောဂါ ကူးစက်မှုများမြင့်တက်ခဲ့ပြီး နှစ်များစွာအတွင်း ရောဂါဖြစ်ပွားမှု သည် အဆိုးဆုံးအခြေအနေရောက်ရှိနေကာ ေ-သဆုံးသူ ၄၀၀ ကျော်လာခဲ့သည်။ ယင်းအခြေအနေကြောင့် ဆေးရုံများသည် ကုသရေး၌ မနိုင်မနင်းဖြစ်နေပြီး အထူးအားဖြင့် မြို့ပြ ဒေသများရှိ ဆေးရုံများမှာ အခက်အခဲတွေ့နေရသည်။
၂၀၂၄ ခုနှစ်တွင် တစ်နိုင်ငံလုံးအတိုင်းအတာအရ ဆက်စပ်ရောဂါဝေဒနာများဖြင့် ေ-သဆုံးခဲ့သူ ၄၀၇ ဦးထက်မနည်း ရှိနေပြီး ဆေးရုံတက်ရောက်ရသူ ၇၈,၅၉၅ ဦး ရှိခဲ့သည်ဟု နောက်ဆုံးထုတ်ပြန်သော ကိန်းဂဏန်းများတွင် ဖော်ပြထားသည်။
နိုဝင်ဘာလလယ်တွင် ဆေးရုံတက်ရောက်ကုသမှုခံရသူ ၄,၁၇၃ ဦးရှိခဲ့ရာ၌ မြို့တော်ဒါကာမှ ၁,၈၃၅ ဦးဖြစ်ပြီး ၂,၃၃၈ ဦးမှာ အခြားဒေသများမှဖြစ်သည်။
“အောက်တိုဘာလမှာတောင် မိုးရာသီလိုမျိုး မိုးရွာသွန်းတာတွေကို ကျွန်တော်တို့ တွေ့ခဲ့ရတယ်၊ ဒါက ပုံမှန်မဟုတ်ပါဘူး” ဟု Jahangimagar တက္ကသိုလ်မှ သတ္တဗေဒပါမောက္ခ ကာဘီရူလ် ဘာရှားက ပြောဆိုသည်။
ရာသီဥတုပြောင်းလဲမှုကြောင့် ဖြစ်ပေါ်သော ရာသီပုံစံများ ပြောင်းလဲခြင်းသည် ရောဂါပိုး အဓိကသယ်ဆောင်သူဖြစ်သော အေဒီးစ်ခြင်မျိုးအတွက် သင့်တော်သော အခြေအနေကို ပေးစွမ်းသည်ဟု သူက ဆက်လက်ပြောဆိုခဲ့သည်။
“ဒီလို ရာသီအပြောင်းအလဲတွေက ခြင်တွေ ပေါက်ဖွားဖို့ရာ အကောင်းဆုံးအခြေအနေတွေကို ဖြစ်ပေါ်စေပါတယ်” ဟု ဆိုသည်။
လူဦးရေထူထပ်သော မြို့ကြီးများတွင် ရောဂါပျံ့နှံ့မှု အဆိုးဆုံးအခြေအနေကို ဇွန်လမှ စက်တင်ဘာလအထိ မိုးရာသီအတွင်း အဖြစ်များလေ့ရှိသော်လည်း ယခုနှစ်တွင် ယင်းပုံမှန်ကာလထက် ကျော်လွန်ကာ ပျံ့နှံ့ဖြစ်ပွားနေခဲ့သည်။
