ဘိုင်ဒန်အစိုးရ ယူကရိန်းကို ထောက်ပံ့မှု ရပ်သင့်ဟု ဟန်ဂေရီပြော
နိုဝင်ဘာ ၁၆
သမ္မတသက်တမ်း ပြည့်တော့မည့် အမေရိကန်သမ္မတ ဂျိုးဘိုင်ဒန်(Joe Biden) ဦးဆောင်သည့် အစိုးရအဖွဲ့ အနေ ဖြင့် ယူကရိန်းအား စစ်ရေးအကူအညီ ပေးနေမှုကို ရပ်တန့်သင့်ပြီဖြစ်ကြောင်း ဟန်ဂေရီဝန်ကြီးချုပ် ဗစ်တာအော် ဘန် (Viktor Orban) က ပြောကြားခဲ့သည်ဟု တာ့စ်သတင်းဌာနမှ ဖော်ပြခဲ့သည်။
အမေရိကန်တွင် ယူကရိန်း စစ်ပွဲနှင့်ပတ်သက်ပြီး အနာဂတ်မူဝါဒများ ချမှတ်ရေးအတွက် ငြင်းခုံမှုများ ရှိနေသည် ဟုလည်း အော်ဘန်က ဆိုသည်။
"ကျနော်က ဘာလုပ်ပါ၊ ဘာမလုပ်ပါနဲ့ဆိုပြီး မပြောနိုင်ပါဘူး။ ဒါပေမယ့် သူတို့ရဲ့ ဖွဲ့စည်းပုံအခြေခံဥပဒေစနစ်ဟာ ကျနော့်အတွက် နည်းနည်းထူးဆန်းနေပါတယ်။ သမ္မတက နိုဝင်ဘာမှာ ရွေးကောက်ခံရပေမယ့် သူဟာ ဇန်နဝါရီ ၂၀ ကျမှ သမ္မတရာထူးကိုရမှာ ဖြစ်ပါတယ်။ အဲဒီလောက်အချိန်တွေ ကွာဟနေတဲ့ အတောအတွင်း အများကြီး ဖြစ်ပျက်သွားနိုင်ပါတယ်။ လက်ရှိ အမေရိကန်အစိုးရအဖွဲ့ထဲမှာ စစ်လိုလားသူတွေပါနေပါတယ်။ ရွေးကောက်ပွဲ အနိုင်ရသွားတဲ့ ဒေါ်နယ်ထရမ့် (Donald Trump) ရဲ့ အဖွဲ့ထဲမှာတော့ ငြိမ်းချမ်းရေး လိုလားသူတွေပါပါတယ်" ဟု အော်ဘန်က ပြောသည်။
သက်တမ်း ကုန်တော့မည့် ဘိုင်ဒန်အစိုးရအဖွဲ့အတွက် တစ်ခုတည်းသော မျှတသည့် နည်းလမ်းမှာ အာဏာ လွှဲပြောင်းချိန်တွင် ယူကရိန်းအတွက် စစ်ရေးအကူအညီများကို လျှော့ချရေးဖြစ်သည်ဟု အော်ဘန်က ဆိုသည်။
"သူတို့အနေနဲ့ ရန်လိုမှုတွေကို မြင့်တက်လာအောင် မလုပ်သင့်တော့ပါဘူး။ သူတို့ဟာ ငြိမ်းချမ်းရေး လိုလားတဲ့ သမ္မတသစ်ကို သူ့ရဲ့ ကတိကဝတ်တွေ အကောင်အထည်ဖော်ခွင့်ပေးသင့်ပါပြီ" ဟု ဟန်ဂေရီဝန်ကြီးချုပ်က ပြောသည်။
အစောပိုင်းကလည်း အော်ဘန်က အမေရိကန်ရွေးကောက်ပွဲတွင် ထရမ့် အနိုင်မည်ဆိုပါက ယူကရိန်းအရေးသည် ငြိမ်းချမ်းစွာ ပြေလည်သွားလိမ့်မည်ဟု မျှော်လင့်ကြောင်း ပြောကြားခဲ့ဖူးသည်။
Source: တာ့စ်
ပုံ - ဟန်ဂေရီဝန်ကြီးချုပ် ဗစ်တာအော်ဘန်ကို တွေ့ရစဉ်
#centralnewsnaypyitaw
