ပေါ့ဘာနဲ့ ဂျူဗင်တပ်စ် စာချုပ်ဖျက်သိမ်းဖို့ သဘောတူညီမှုရရှိ
နိုဝင်ဘာ ၁၆
ပြင်သစ်ကွင်းလယ်လူ ပေါ့ဘာဟာ ဂျူဗင်တပ်စ်အသင်းနဲ့ စာချုပ်ဖျက်သိမ်းဖို့ သဘောတူညီမှုရရှိခဲ့တာကြောင့် နိုဝင်ဘာ ၃၀ ရက်မှာ အသင်းကနေ ထွက်ခွာတော့မှာ ဖြစ်ပါတယ်။
ပေါ့ဘာဟာ တားမြစ်ဆေးသုံးစွဲမှုကြောင့် ပွဲကစားခွင့် ၄ နှစ်ကြာ ပိတ်ပင်ထားတဲ့ ပြစ်ဒဏ်ကို အယူခံဝင်ခဲ့တာမှာ ၁၈ လ လျှော့ချခံခဲ့ရတာပါ။
အဲဒါကြောင့် ပေါ့ဘာဟာ ၂၀၂၅ ခုနှစ်၊ဇန်နဝါရီလမှာ လေ့ကျင့်မှုတွေပြုလုပ်ပြီး မတ်လမှာ ပွဲတွေပြန်ကစားလို့ရပြီ ဖြစ်ပါတယ်။
ပေါ့ဘာဟာ ဂျူဗင်တပ်စ်အသင်းနဲ့ စာချုပ်ဖျက်သိမ်းခဲ့တဲ့အတွက် လာမယ့်ဇန်နဝါရီအပြောင်းအရွှေ့မှာ အသင်းသစ်တစ်သင်းထံ ပြောင်းရွှေ့လို့ရပြီဖြစ်တာပါ။
ဂျူဗင်တပ်စ်အသင်းက ပေါ့ဘာရဲ့ ပရော်ဖက်ရှင်နယ်အနာဂတ်အတွက် အကောင်းဆုံးဖြစ်ဖို့ ဆုတောင်းကြောင်း ထုတ်ပြန်ခဲ့တဲ့ ကြေညာချက်ထဲမှာ ဖော်ပြထားပါတယ်။
ပေါ့ဘာကလည်း ဂျူဗင်တပ်စ်အသင်းနဲ့ လုပ်ဆောင်ခဲ့တဲ့ အမှတ်တရတွေကို အမြဲတမ်းမြတ်နိုးနေမှာဖြစ်ပြီး အခုအချိန်မှာ နောက်ထပ်အခန်းကဏ္ဍအသစ်ကို စောင့်မျှော်ကာ အသင်းသစ်နဲ့အတူ ကွင်းထဲကို ဝင်ရောက်ချင်နေပြီလို့ ပြောခဲ့ပါတယ်။
ပေါ့ဘာဟာ ဂျူဗင်တပ်စ်အသင်းကို ၂၀၂၂ ခုနှစ်နွေရာသီက ပြန်လည်ရောက်ရှိခဲ့ပြီး ၂၀၂၆ ခုနှစ်၊ဇွန်လအထိ စာချုပ်ချုပ်ခဲ့တာပါ။
ဒါပေမယ့် ပေါ့ဘာဟာ ဒဏ်ရာတွေ၊တားမြစ်ဆေးကြောင့် ပွဲကစားခွင့်ပိတ်ပင်ခံခဲ့ရပြီး ဂျူဗင်တပ်စ်အသင်းအတွက် ၁၂ ပွဲသာ ပါဝင်ကစားနိုင်ခဲ့တာဖြစ်ပါတယ်။
ပေါ့ဘာဟာ လက်ရှိအချိန်မှာ အသင်းသစ်ရရှိဖို့အတွက် သီးသန့်လေ့ကျင့်မှုတွေ ပြုလုပ်နေတာပါ။
အသက် ၃၁ နှစ်အရွယ်ရှိ ပေါ့ဘာဟာ ပြင်သစ်အသင်းနဲ့အတူ ၂၀၂၆ ကမ္ဘာ့ဖလားပြိုင်ပွဲမှာ ပါဝင်ကစားဖို့ စိတ်ဆန္ဒပြင်းပြနေတယ်လို့ သိရပါတယ်။
ပေါ့ဘာဟာ ပြီးခဲ့တဲ့၂၀၂၂ ကမ္ဘာ့ဖလားပြိုင်ပွဲနဲ့ ယူရို ၂၀၂၄ ပြိုင်ပွဲတွေမှာ ပြင်သစ်အသင်းအတွက် ပါဝင်နိုင်ခဲ့ခြင်းမရှိတာပါ။
ပေါ့ဘာဟာ ပြင်သစ်အသင်းအတွက် ၉၁ ပွဲကစားထားပြီး ၁၁ ဂိုးသွင်းယူကာ ၂၀၁၈ ကမ္ဘာ့ဖလားနဲ့ ၂၀၂၀-၂၁ နေးရှင်းလိဂ်ဖလားတွေကို ရယူနိုင်ခဲ့တာဖြစ်ပါတယ်။
Source:BBC
#သတင်းဟင်းလေးအိုးကြီး
