ရှီနှင့် ဘိုင်ဒင်တို့ အေပက်အစည်းအဝေးပြင်ပ၌တွေ့ဆုံမည်
လီမာ၊နိုဝင်ဘာ ၁၄
အမေရိကန်သမ္မတဂျိုးဘိုင်ဒင်သည် အိမ်ဖြူတော်မှမထွက်ခွာမီ နောက်ဆုံးအနေဖြင့် အာရှ-ပစိဖိတ်စီးပွားရေးပူးပေါင်းဆောင်ရွက်မှုဖိုရမ် (အေပက်) ပြင်ပ၌ တရုတ်သမ္မတရှီနှင့်တွေ့ဆုံမည်ဖြစ်ကြောင်းသိရပြီး အင်အားကြီးနှစ်နိုင်ငံအကြား ပူးပေါင်းဆောင်ရွက်မှု၏ အရေးပါမှုများကို အဓိကထားပြောကြားသွားမည်ဖြစ်သည်ဟုလည်းသိရသည်။
ယခုအစည်းအဝေးသည် သမ္မဘိုင်ဒင်၏နောက်ဆုံးအစည်းအဝေးဖြစ်သဖြင့် ကမ္ဘာ့အင်အားကြီး စီးပွားရေးနှစ်နိုင်ငံအကြား ဆက်ဆံရေးတည်ငြိမ်မှုရရှိစေေရးကိုအလေးပေးပြောကြားရန် ယခုအစည်းအဝေးကိုအသုံးပြုနိုင်ချေရှိသည်ဟုလည်း ဘိုင်ဒင်၏သမ္မတရုံးကပြောကြားခဲ့သည်။
တရုတ်နှင့်အမေရိကနှစ်နိုင်ငံ ဆက်ဆံရေးသည် ပြီးခဲ့သည့်နှစ်နိုဝင်ဘာကကျင်းပပြုလုပ်ခဲ့သည့် အေပက်ထိပ်သီးအစည်းအဝေးပြင်ပ၌ သမ္မတနှစ်ဦး၏တွေ့ဆုံမှုအပြီးနောက်ပိုင်း တိုးတက်မှုတချို့ရှိလာခဲ့သည်။ ယင်းနောက် အဆင့်မြင့်အရာရှိများအကြား စစ်ရေးအရတွေ့ဆုံဆွေးနွေးမှုများကိုလည်း ယခုနှစ်ဇန်နဝါရီလကပြုလုပ်ခဲ့ကြသည်။
သမ္မတဘိုင်ဒင်နှင့်သမ္မတရှီတို့သည် တစ်ဦးနှင့်တစ်ဦးသိနေကြသည်မှာကြာပြီဖြစ်ပြီး ၎င်းတို့နှစ်ဦးသည် ဒုတိယသမ္မတများဘဝကတည်းက သိနေကြသူများဖြစ်သဖြင့် ယခုတွေ့ဆုံဆွေးနွေးမှုတွင် အခြားအကြောင်းအရာများကိုပါထည့်သွင်းဆွေးနွေးသွားနိုင်ကြောင်းလည်းခန့်မှန်းထားကြသည်။
နှစ်နိုင်ငံဆက်ဆံရေးအပြင် ဉာဏ်ရည်တု၊ထိုင်ဝမ်အရေး၊တောင်တရုတ်ပင်လယ်အရေးနှင့် လူ့အခွင့်အရေးကာကွယ်မှုဆိုင်ရာကိစ္စများကိုပါ ထည့်သွင်းဆွေးနွေးသွားနိုင်ခြေရှိသည်ဟုလည်းသိရသည်။ နောက်တက်မည့်သမ္မတထရမ့်ပ်လက်ထက်၌မူ တည်ငြိမ်နေသည့်နှစ်နိုင်ငံဆက်ဆံရေးသည် ပြန်လည်ချွတ်ချော်သွားနိုင်သည်ဟုလည်း ပညာရှင်များကခန့်မှန်းနေကြသည်။
ထရမ့်ပ်ကမူ တရုတ်နှင့်အမေရိကကြားရှိနေသည့် ကုန်သွယ်ရေးစနစ်သည် သမမျှတမှုမရှိသဖြင့် တရုတ်တင်သွင်းကုန်များကို အခွန်စည်းကြပ်မှု ၆၀ ရာခိုင်နှုန်းအထိပြုလုပ်သွားမည်ဖြစ်ကြောင်းလည်းပြောကြားထားသည်။
“နောင်တက်မဲ့အစိုးရအနေနဲ့ကတော့ တင်းမာရှုပ်ထွေးတဲ့ဆက်ဆံရေးမျိုးတွေကိုထပ်မဖြစ်လာစေဖို့ စီမံလုပ်ဆောင်ပြီး နည်းလမ်းဖော်ဆောင်ဖို့တော့လိုပါလိမ့်မယ်” ဟုလည်း ဘိုင်ဒင်အစိုးရ၏ အရာရှိတစ်ဦးကပြောကြားခဲ့သည်။
