ဘန်ကောက်တွင် ထိုင်းအမျိုးသားရေးလှုပ်ရှားသူများ ဆန္ဒပြ

နိုဝင်ဘာ ၅၊ နိုင်ငံတကာ။

အကျိုးစီးပွား ပဋိပက္ခမဖြစ်ဘဲ နယ်စပ်ကိုကာကွယ်ရန်ဟုဆိုတာ ထိုင်းအမျိုးသားရေးလှုပ်ရှားသည့်အဖွဲ့ပေါင်းစုံက ထိုင်းနိုင်ငံ၊ ဘန်ကောက်မြို့၊ ထိုင်းအစိုးရအဖွဲ့အိမ်တော်ရှေ့၌ ယနေ့ ချီတက်ဆန္ဒပြခဲ့ကြောင်း ထိုင်းသတင်းဌာနများတွင် ဖော်ပြသည်။

ထိုင်းနိုင်ငံတွင် နှစ်ရှည်လုပ်ကိုင်နေသည့် ရွှေ့ပြောင်းအလုပ်သမားများ အပါအဝင် လူပေါင်း ၄၈၃,၀၀၀ ခန့်ကို ထိုင်းနိုင်ငံသားဖြစ်ခွင့်ပြုမည်ဟု အောက်တိုဘာ ၂၉ ရက်က ပြုလုပ်သော အစိုးရအဖွဲ့အစည်းအဝေး၌ အတည်ပြုခဲ့မှုအပေါ် မလိုလားကြောင်း တောင်းဆိုခဲ့သည်ဟုလည်း သိရသည်။

ထို့ပြင် ထိုင်းနိုင်ငံသည် ထိုင်းလူမျိုးများဖြင့် အုပ်ချုပ်ရှေ့ဆက်ရမည်၊ ထိုင်းနိုင်ငံကို ကယ်တင်ရန် အတူတကွ ပူးပေါင်းပါဟူ၍လည်း ဆန္ဒပြသူများက ကြွေးကြော်တောင်းဆိုခဲ့သည်။

ထိုင်းနိုင်ငံရှိ အလုပ်သမားရေးဆောင်ရွက်သူတဦးက “ထိုင်းအာဏာပိုင်တွေကလည်း သတင်းထုတ်ပြန်ထားတာရှိတယ်။ ထိုင်းမှာအနေကြာတဲ့လူတွေအတွက် နိုင်ငံသားဖြစ်ခွင့်ပြုမယ်ဆိုတာ၊ အဲဒါတွေက ဒီအဖွဲ့တွေအတွက် အတိုက်အခံ ဖြစ်နေတယ်။ လူမျိုးရေးဝါဒနဲ့ လိုက်လုပ်နေတယ်လို့ မြင်ပါတယ်။ ဒီလို နိုင်ငံသားမပေးတာတောင် မြန်မာပြည်သားတွေက ကိုယ်ပိုင်လုပ်ငန်းတွေ လုပ်ကိုင်နေတယ်ဆိုတဲ့ ပြစ်တင်မှုတွေနဲ့ ဝေဖန်ပြီးတော့ သက်သက် လူမျိုးရေးခွဲခြားရေးဆက်ဆံမှု တွေ လုပ်နေတယ်လို့ ကျနော်တို့မြင်တယ်” ဟု ပြောသည်။

ထိုင်းနိုင်ငံတွင်း နှစ်ရှည်ရွှေ့ပြောင်းနေထိုင်လုပ်ကိုင်သူများနှင့် နှစ်ရှည်အခြေချနေထိုင်ပြီး ၁၉၈၄ ခုနှစ်မှစ၍ နိုင်ငံသားဖြစ်ခွင့် မရသေးသည့် လူနည်းစုမိဘများမှ မွေးဖွားလာသော ကလေးငယ်များကို ထိုင်းနိုင်ငံသားဖြစ်ခွင့် ပေးမည်ဖြစ်ကြောင်း မကြာသေးမီ၌ ထိုင်းအစိုးရက အတည်ပြုထားသည်။

ဓာတ်ပုံ - Thairath - ไทยรัฐออนไลน์

Credit - ဧရာဝတီသတင်းဌာန

#သတင်းဟင်းလေးအိုးကြီး