တောင်ကိုရီးယား၊ဂျပန်နှင့်အမေရိကတို့ ပူးတွဲလေကြောင်းစစ်ရေးလေ့ကျင့်

ဆိုးလ်၊နိုဝင်ဘာ ၃

တောင်ကိုရီးယား၊အမေရိကနှင့်ဂျပန်တို့သည် အမေရိက၏ မဟာဗျူဟာမြောက်ဗုံးကြဲလေယာဉ်ပါဝင်သော ပူးတွဲလေကြောင်းစစ်ရေးလေ့ကျင့်မှုကို တနင်္ဂနွေနေ့ကပြုလုပ်ခဲ့ကြောင်း တောင်ကိုရီးယား ပူးတွဲစစ်ဦးစီးချုပ်များ (JCS) ကပြောကြားခဲ့သည်။

အဆိုပါသုံးနိုင်ငံစစ်ရေးလေ့ကျင့်မှုကို တောင်ကိုရီးယားတောင်ပိုင်း ဂျဲဂျူးကျွန်းအရှေ့ဘက်ရေပြင်တွင် ပြုလုပ်ခဲ့ခြင်းဖြစ်ကြောင်း JCS က သတင်းထုတ်ပြန်ခဲ့ပြီး ယခုနှစ်အတွက် ကိုရီးယားကျွန်းဆွယ်သို့ အမေရိက၏မဟာဗျူဟာမြောက် ဗုံးကြဲလေယာဉ်လာရောက်မှုစတုတ္ထအကြိမ်ဖြစ်ကြောင်းလည်းဆိုခဲ့သည်။

ယခုလေ့ကျင့်မှုတွင် တောင်ကိုရီးယားလေတပ်မှ F-15K၊ KF-16 တိုက်လေယာဉ်များ၊B-1B ဗုံးကြဲလေယာဉ်နှင့် အမေရိကန်လေတပ်မှ F-16 တိုက်လေယာဉ်များ၊ဂျပန်လေတပ်မှ F-2 တိုက်လေယာဉ်များပါ ပေါင်းစပ်လေကြောင်း လေ့ကျင့်မှုပြုလုပ်ခဲ့သည်ဟုပြောကြားခဲ့သည်။

အဆိုပါစစ်ရေးလေ့ကျင့်မှုအတွင်း သုံးနိုင်ငံမှ တိုက်လေယာဉ်များ ဝန်းရံပျံသန်းနေသည့် အမေရိက ဗုံးကြဲလေယာဉ်သည် သတ်မှတ်ထား‌သောပစ်မှတ်တစ်ခုကို ထိမှန်အောင်ပစ်ခတ်လေ့ကျင့်ခဲ့ကြောင်းနှင့် လေ့ကျင့်မှုသည် ယခုနှစ်အတွက် သုံးနိုင်ငံကြား ဒုတိယမြောက် လေကြောင်း စစ်ရေးလေ့ကျင့်မှုဖြစ်ကြောင်းလည်းသတင်း ကြေငြာချက်တွင်ဖော်ပြထားသည်။

သုံးနိုင်ငံစစ်ရေးလေ့ကျင့်မှုသည် အောက်တိုဘာ ၃၁ ရက်က ကိုရီးယားဒီမိုကရက်တစ်ပြည်သူ့သမ္မတနိုင်ငံက ပစ်လွှတ်ခဲ့သည့် တိုက်ချင်းပစ်ဒုံးကျည် (ICBM) ကို တုံ့ပြန်ခြင်းဖြစ်ကြောင်းလည်း JCS ကပြောကြားခဲ့သည်။