၂ နှစ်အတွင်း ဒေါ်လာ ၇၅၀၀၀ စုဆောင်းနိုင်တဲ့ တောင်ကိုရီးယားရဲ့ ကပ်စေးအနည်းဆုံးအမျိုးသမီး
တောင်ကိုရီးယားရဲ့ ကပ်စေးအနည်းဆုံး မိန်းကလေးဟာ လစာနည်းပေမဲ့ ၂ နှစ်တာအတွင်း ဒေါ်လာ ၇၅၀၀၀ (မြန်မာငွေ သိန်း ၂၇၀၀ ကျော်) စုဆောင်းနိုင်ခဲ့ပါတယ်။ ဂျီဟွန်ကွက်ဟာ လွန်ခဲ့တဲ့ နှစ်အနည်းငယ်ကတည်းက SBS ရုပ်သံလိုင်းရဲ့ Master of Living ရုပ်သံအစီအစဉ်မှာ ပါဝင်ခွင့်ရခဲ့သူပါ။ အဲဒီအချိန်တုန်းက သူဟာ တောင်ကိုရီးယားနိုင်ငံမှာ တိုက်ခန်းစုငွေအစီအစဉ် ပါဝင်ခွင့်ရတဲ့ အသက်အငယ်ဆုံးလည်း ဖြစ်ပါတယ်။
ပုံမှန်အားဖြင့် ၂၄ နှစ်အရွယ်တွေဟာ ငွေများများစားစား စုနိုင်လေ့မရှိပေမဲ့ ဂျီဟွန်ကွက်ကတော့ တစ်လကို အခြေခံလစာ ဝမ် ၂.၂ သန်းပဲ ရပေမဲ့ ၄ နှစ်အတွင်း ဝမ်သန်း ၁၀၀ ( အမေရိကန်ဒေါ်လာ ၇၅၀၀၀) စုဆောင်းနိုင်ခဲ့တာပါ။
ပြီးခဲ့တဲ့ သီတင်းပတ်အတွင်းမှာတော့ ဂျီဟွန်ကွက်ရဲ့ သတင်းက တစ်ကျော့ပြန် ပျံ့နှံ့လာခဲ့ပါတယ်။ သူဟာ လွန်ခဲ့တဲ့ ၂ နှစ်အတွင်း ဝမ်သန်း ၁၀၀ ထပ်စုနိုင်ခဲ့လို့ပါပဲ။ လွန်ခဲ့တဲ့ ၄ နှစ်က စုဆောင်းနိုင်ခဲ့တဲ့ ပမာဏကို ၂ နစ်အတွင်း ထပ်မံစုဆောင်းနိုင်ခဲ့တာပါ။ သူ့ရဲ့တိုက်ခန်းစုငွေအကောင့်ထဲမှာ ဝမ်သန်း ၂၀၀ ရှိလာပါပြီ။
သူဟာ ပထမ ၄ နှစ်အတွင်း ဝမ်သန်း ၁၀၀ စုဖို့ ခက်ခက်ခဲခဲ ကြိုးပမ်းခဲ့ရပေမဲ့ နောက် ၂ နှစ်အတွင်းမှာ ဝမ်သန်း ၁၀၀ စုရတာ ထင်သလောက် မခက်တော့ဘူးလို့ ဆိုပါတယ်။ အင်မတန် ခြိုးခြံချွေတာပြီး စုဆောင်းတဲ့ နည်းစနစ်တွေကြောင့် သူ့ရဲ့ YouTube အကောင့်မှာလည်း Follower ၂၀၀၀၀ ကျော် ရှိလာပါပြီ။ သူဟာ Youtube ကနေလည်း ဝင်ငွေရနေပေမဲ့ ပုံမှန်လစာထဲက စုဆောင်းငွေကိုပဲ ထည့်သွင်းတွက်ချက်တယ်လို့ ဆိုပါတယ်။
သူဟာ လစာငွေရဲ့ ၉၀ ရာခိုင်နှုန်းကို ငွေစုခဲ့တာဖြစ်ပြီး တစ်လကို စားသောက်စရိတ် ဝမ် ၈၄၀၀ လောက်ပဲ သုံးပြီး လျှော့ဈေးကူပွန်တွေ သုံးတာ၊ သောက်ရေဝယ်မသောက်ဘဲ ဘုံပိုင်ရေကိုပဲ သုံးတာ၊ ဆံပင်ကိုယ့်ဘာသာကိုယ် ညှပ်တာမျိုး လုပ်လေ့ရှိပါတယ်။ သူဟာ ပြီးခဲ့တဲ့ ဇန်နဝါရီလအတွင်း စားသောက်စရိတ်၊ အသွားအလာစရိတ်နဲ့ အာမခံကြေး အားလုံးအတွက် ဝမ် ၅ သိန်းပဲ အသုံးပြုခဲ့တာပါ။
Ref: South Korea’s Thriftiest Woman Saves $75,000 in Two Years by Being Extremely Frugal
