နည်းပြဆာဟင်ကို ထုတ်ပယ်ရန် ဒေါ့မွန် အစီအစဉ်မရှိ
-----------------------
အခုဘောလုံးရာသီမှာ ရလဒ်ပိုင်းဆိုးရွားနေခဲ့ပေမယ့်လည်း ဒေါ့မွန်အသင်းဟာ အသင်းရဲ့ကစားသမားဟောင်း တစ်ယောက်ဖြစ်သလို လက်ရှိနည်းပြလည်းဖြစ်တဲ့ ဆာဟင်ကို ရာထူးကနေ ထုတ်ပယ်သွားဖို့အတွက် အစီစဉ် မရှိသေးဘူးလို့ အောက်တိုဘာလ(၃၀)ရက်နေ့မှာ ပြောကြားခဲ့ပါတယ်။ ဆာဟင်ဟာ အခုဘောလုံးရာသီမှာမှ ဒေါ့မွန်အသင်းကို နည်းပြအဖြစ် ကိုင်တွယ်နေခဲ့တာဖြစ်ပြီး ဒေါ့မွန်အသင်းဟာ နည်းပြဆာဟင်လက်ထက်မှာ ရလဒ်ပိုင်း ဆိုးရွားနေခဲ့တာပါ။
အသင်းရဲ့လက်ရှိရလဒ်တွေအပေါ် စိတ်ပျက်မိပေမယ့်လည်း ဆာဟင်ကို ထုတ်ဖို့ စိတ်ကူးမရှိသေးပဲ လက်ရှိရလဒ်ဆိုးတွေကို စည်းစည်းလုံးလုံးနဲ့ ကျော်ဖြတ်သွားမယ်လို့ ဒေါ့မွန်အသင်းရဲ့ အားကစားဒါရိုက်တာ ဆီဘက်စတီယန်ခဲလ်က ပြောကြားခဲ့ပါတယ်။ အခုအချိန်မှာ သွင်းဂိုးတွေရဖို့ အခက်တွေ့ နေပေမယ့်လည်း အရင်ကလိုမျိုး အောင်မြင်မှုရဖို့အတွက် လုပ်ဆောင်နိုင်မယ်လို့ ယုံကြည်ကြောင်းကိုလည်း ဒေါ့မွန်အသင်းရဲ့ အားကစားဒါရိုက်တာက ဆက်လက်ပြောကြားခဲ့ပါသေးတယ်။ ဒေါ့မွန်အသင်းဟာ အခုရာသီ ဘွန်ဒက်လီဂါ (၈)ပွဲကစားပြီးချိန်မှာ (၄)ပွဲနိုင်၊ (၁)ပွဲသရေ၊ (၃)ပွဲရှုံး၊ ရမှတ်(၁၃)မှတ်နဲ့အတူ အမှတ်ပေးဇယားရဲ့ အဆင့်(၇)နေရာမှာ ရပ်တည်နေတာဖြစ်ပါတယ်။
