မကူးစက်နိုင်သောရောဂါများ ဖြစ်ပွားနိုင်မှု စစ်တမ်းကောက်မည်
----------------------
ပြည်သူလူထုအတွင်း မကူးစက်နိုင်တဲ့ရောဂါတွေ ဖြစ်ပွားနိုင်ခြေ လေ့လာခြင်း သုတေသနစစ်တမ်းကို တိုင်းဒေသ ကြီးနဲ့ ပြည်နယ်(၁၃)ခုမှာ ကောက်ယူသွားမှာဖြစ်တယ်လို့ ကျန်းမာရေးဝန်ကြီးဌာနကနေ သိရပါတယ်။
မြန်မာ နိုင်ငံမှာ ပြည်သူလူထုအတွင်း မကူးစက်နိုင်တဲ့ရောဂါတွေ ဖြစ်ပွားနိုင်ခြေတွေကို လေ့လာခြင်း သုတေသန စစ်တမ်းကို ၂၀၀၃ ခုနှစ်၊ ၂၀၀၉ ခုနှစ်နဲ့ ၂၀၁၄ ခုနှစ်တို့မှာ ဆောင်ရွက်ခဲ့ပြီး အဲဒီစစ်တမ်းဟာ ကျန်းမာရေးနဲ့ မညီညွတ်တဲ့ အပြုအမူတွေနဲ့ ဇီဝကမ္မဗေဒဆိုင်ရာ အန္တရာယ်အခြေအနေတွေကိုပါ ခြုံငုံကောက်ယူနိုင်တဲ့ လွယ်ကူရိုးရှင်းတဲ့ စစ်တမ်းဖြစ်တယ်လို့ ဆိုပါတယ်။
ကမ္ဘာပေါ်မှာ မကူးစက်နိုင်သော ရောဂါတွေကြောင့် နှစ်စဉ် လူဦးရေ ၄၁ သန်းခန့် သေဆုံးနေကြပြီး ကမ္ဘာတစ်ဝန်းသေဆုံးမှုအားလုံးရဲ့ ၇၄ ရာခိုင်နှုန်းရှိနေတာကို ကမ္ဘာ့ ကျန်းမာရေးအဖွဲ့ရဲ့ အချက်အလက်တွေအရ သိရပါတယ်။ မြန်မာနိုင်ငံမှာ မကူးစက်နိုင်တဲ့ရောဂါတွေကြောင့် ဆေးရုံတက်ရောက်မှုတွေ တဖြည်းဖြည်းမြင့်တက်လာပြီး ၂၀၂၃ ခုနှစ်မှာကောက်ခံထားတဲ့ အချက်အလက်တွေ အရ ဆေးရုံတက်လူနာသေဆုံးမှုတွေရဲ့ ထက်ဝက်ကျော်ဟာ မကူးစက်နိုင်တဲ့ ရောဂါတွေကြောင့် ဖြစ်တယ်လို့ သိရပါတယ်။
