မလေး၊အင်ဒို၊ဗီယက်နမ်နှင့်ထိုင်းတို့ BRICS ၏ မိတ်ဘက်နိုင်ငံများဖြစ်လာ
စင်္ကာပူ၊အောက်တိုဘာ ၂၄
အာဆီယံအဖွဲ့နိုင်ငံများဖြစ်သည့် မလေးရှား၊အင်ဒိုနီးရှား၊ဗီယက်နမ်နှင့်ထိုင်းတို့သည် BRICS ၏ မိတ်ဘက်နိုင်ငံများဖြစ်လာကြောင်းသိရှိရသည်။
ယခုနှစ် BRICS ထိပ်သီးအစည်းအဝေးအတွင်း အဖွဲ့အတွင်းသို့ မိတ်ဘက်အဖြစ် ၁၃ နိုင်ငံကို ထပ်တိုးလက်ခံခဲ့ကြောင်းသိရပြီး အာဆီယံလေးနိုင်ငံအပြင် အယ်လ်ဂျာရီးယား၊ဘီလာရုစ်၊ဘိုလီဗီးယား၊ကျူးဘား၊ကာဇက်စတန်၊နိုင်ဂျီးရီးယား၊တုကီယေး၊ယူဂန်ဒါနှင့်ဥဇဘက်ကစ်စတန်တို့လည်းပါဝင်သည်။
သို့သော် လတ်တလောတွင် ၎င်းတို့သည် ၂၀၀၆ ခုနှစ်ကစတင်တည်ထောင်ခဲ့ပြီး ဘရာဇီး၊ရုရှား၊အိန္ဒိယနှင့် တရုတ်တို့ပါဝင်သော BRICS အဖွဲ့၏အချိန်ပြည့် အဖွဲ့ဝင်များမဖြစ်သေးပေ။
တောင်အာဖရိကသည် BRICS ကို ၂၀၁၀ ပြည့်နှစ်တွင် ပူးပေါင်းခဲ့ပြီး အီဂျစ်၊အီသီယိုးပီးယား၊အီရန်နှင့် အာရပ်စော်ဘွားများပြည်ထောင်စု (UAE) တို့ကို ယခုနှစ်တွင် BRICS အဖွဲ့ဝင်များအဖြစ် တရားဝင်သတ်မှတ်လိုက်ခြင်းလည်းဖြစ်သည်။
