တောင်ရိုးပျော် ဆရာတော်သို့
တို့ရဲဘော်ကြီး ဦးသာနိုး
စစ်ကိုင်တောင်ရိုးမှာ ဒုလ္လဘရဟန်းခံသတဲ့
ဒီသင်္ကြန်ရဲ့ မော်ဒန်သတင်းတစ်ခုပါ
သာဓု…သာဓု…သာဓု။
ဗုဒ္ဓရဲ့ အနတ္တအလံကို
မှန်မှန်ကန်ကန် သိမြင်အောင်
ကိုယ်တွေ့ကျင့်စဉ် ကျင့်ဖို့လေလား။
အများအမြင်မှာတော့
ဟားချင်လည်းဟားမှာပေါ့
ဗုဒ္ဓတရားတော်နဲ့ မော်ဒန်ခေါင်းဆောင်
ဘယ်လိုလုပ်ကြောင်တာလဲလို့
နားမလည်အောင် ဖြစ်ကြမယ်။
ဓာတ်သိရပ်သိတွေကတော့
ဟတ္ထိကို ယုန်မထင်ပါဘူး
သု့အမြင် သု့အကြား
သူကောင်းတယ် ယုံကြည်လို့
ခပ်တည်တည် အများမထင်မှတ်တဲ့
ဘုရားရှင်မြတ်ရဲ့ အရဟတ္ထဓဇဂိုဏ်ဝင်
ရဟန်းရှင်အဖြစ် ခံယူလိုက်တာပါ။
ဦးသာနိုးဆိုတာ
ရိုးလည်ရိုးသား နိုးလည်းနိုးကြားတဲ့
စစ်ကိုင်းသား လူချွန်
ပုဂ္ဂိုလ်မွန်တစ်ဦးပါ။
ဟန်ဆောင်တဲ့စကားတွေနဲ့
မြန်ဘောင်မှာ မကြွားတတ်ပါဘူး
လှံထောင်ထားသလိုထက်မြက်
သူ့လက်နက်က သစ္စာမို့
နစ်နာအောင် အရည်စူးသော်လည်း
ပစ်ပစ်ခါခါတွေပြောဖူးတယ်
သူ့ထူးခြားချက်က ပွင့်လင်းတာလေ။
ဗုဒ္ဓတရားကို
အဟုတ်ပ နားလည်
မယားသည်ကလည်း အားပေးထင်ပါ့
ရှင်ရဟန်းအထွက်
သင်္ကန်းဝတ်ဖြစ်သွားတာနေမှာပါ။
ဘာပဲဖြစ်ဖြစ်
ဦးပြည်းအသစ်နဲ့လည်း
ထူးပြီးချစ်ရပါတယ်
နှစ်သစ်ရဲ့ မြတ်ကောင်းမှုကို
သာဓုခေါ် ပြီး ပျော်မိပါတယ်။
တို့ချစ်တယ့် ဆရာနိုးကို
ရှိခိုးကော်ရော်၊ ပူဇော်ကန်တော့ပန်းနဲ့
အလွမ်းလက်အုပ်ချီလိုက်ပါတယ်
ပြာရီရီအမှောင်ပျိုး
တောင်ရိုးပျော် ကိုယ်တော်
တို့ရဲဘော် ဆရာကြီးခင်ဗျာ။
တင်မိုး
၁၆-၄-၂၀၀၀
