ကလေးမြို့နယ်တွင် ပြည်ပပို့ကုန် နှမ်းသီးနှံ ဧက (၂၂၀၀၀) ကျော် ရိတ်သိမ်း
ပြည်ပပို့ကုန်နှမ်းသီးနှံကို စစ်ကိုင်းတိုင်းဒေသကြီး၊ ကလေးမြို့နယ်တွင် ရိတ်သိမ်းနေပြီဖြစ်ရာ ဧက(၂၂၀၀၀) ကျော်ရိတ်သိမ်းပြီးဖြစ်ကြောင်း ကလေးမြို့နယ်စိုက်ပျိုးရေးဦးစီးဌာနမှ သိရသည်။
စစ်ကိုင်းတိုင်းဒေသကြီး၊ ကလေးခရိုင်၊ ကလေးမြို့နယ်တွင် မိုးသီးနှံနှမ်းကို သြဂုတ်လက စတင်ရိတ်သိမ်းနေရာ ယနေ့အထိ (၂၂၁၆၄) ဧက ရိတ်သိမ်းပြီးဖြစ်ကြောင်း သိရသည်။
"လက်ရှိစိုက်ထားတဲ့ နှမ်းစိုက်ခင်းအားလုံးရာနှုန်းပြည့်ရိတ်သိမ်းပြီးပါပြီ။ အထွက်နှုန်းကောင်းမွန်တဲ့ GAP နည်းစနစ်နဲ့စိုက်ခဲ့ကြတာပါ။ တစ်ဧက ၆.၆၁ တင်း ထွက်ရှိနေပါတယ်" ဟု ကလေးမြို့နယ်စိုက်ပျိုးရေးဦးစီးဌာန၊ မြို့နယ်ဦးစီးမှုးဦးနိုင်ထွန်းဝင်းက ပြောသည်။
ကလေးမြို့နယ် နှမ်းစိုက်တောင်သူများကို မြို့နယ်စိုက်ပျိုးရေးဦးစီးဌာနက နှမ်းတိုးချဲ့စိုက်ပျိုးနိုင်ရေး၊ GAP နည်းစနစ်နဲ့စိုက်ပျိုးနိုင်ရေး၊ မျိုးကောင်းမျိုးသန့် စိုက်ပျိုးနိုင်ရေး၊ အ ထွက်နှုန်းကောင်းမွန်သည့် မျိုးများစိုက်ပျိုးနိုင်ရေးအသိပညာပေးလုပ်ငန်းများဆောင်ရွက်ပေးခဲ့ကြောင်း သိရသည်။
"GAP နည်းစနစ်နဲ့ စိုက်ပျိူးထုတ်လုပ်တဲ့ သီးနှံတွေဟာ အခြားစိုက်စနစ်နဲ့ စိုက်ပျိုးထုတ်လုပ်ထားတဲ့ သီးနှံတွေထက် အရည်အသွေး ပိုမိုကောင်းမွန်ပြီး ပြည်တွင်းစျေးကွက်သာမက ပြည်ပစျေးကွက်ကိုပါ တင်ပို့ရောင်းချနိုင်ပါတယ်"ဟု နှမ်းစိုက်တောင်သူတစ်ဦးက ပြောသည်။
