(၄၂)ကြိမ်မြောက် အာဆီယံရဲအဖွဲ့ညီလာခံကို ဒု-ဗိုလ်ချုပ်ကြီးရာပြည့်တက်ရောက်ဖွင့်လှစ်
မြန်မာနိုင်ငံမှအိမ်ရှင်အဖြစ်လက်ခံကျင်းပသော (၄၂)ကြိမ်မြောက် အာဆီယံရဲအဖွဲ့ညီလာခံဖွင့်ပွဲအား ယနေ့ အောက်တိုဘာ ၂၂ ရက်နံနက်ပိုင်းက နေပြည်တော်၌ကျင်းပရာ နစက အဖွဲ့ဝင်၊ ပြည်ထဲရေးဝန်ကြီးဌာန ပြည်ထောင်စုဝန်ကြီး ဒု-ဗိုလ်ချုပ်ကြီးရာပြည့်မှ ဂုဏ်ထူးဆောင်ဧည့်သည်တော်အဖြစ်တက်ရောက်၍ဖွင့်လှစ်ပေးခဲ့သည်။
ဖွင့်ပွဲတွင် အထူးဧည့်သည်တော်အဖြစ် အပြည်ပြည်ဆိုင်ရာအဖွဲ့(INTERPOL)ဥက္ကဋ္ဌ Mr. Ahmed Naser Al-Raisi နှင့် အာဆီယံရဲအဖွဲ့ဝင်နိုင်ငံများမှရဲချုပ်များ၊ အဆင့်မြင့်ရဲအရာရှိကြီးများ၊ ကိုယ်စားလှယ်အဖွဲ့ဝင်များ၊ ဆွေးနွေးဘက်နိုင်ငံနှင့်အဖွဲ့အစည်းများဖြစ်သည့် ရုရှား၊ ဩစတြေးလျ၊ တရုတ်၊ အပြည်ပြည်ဆိုင်ရာရဲအဖွဲ့ (INTERPOL)၊ အာဆီယံအတွင်းရေးမှူးချုပ်ရုံးတို့မှကိုယ်စားလှယ်များနှင့်ဖိတ်ကြားထားသူများတက်ရောက်ခဲ့ကြသည်။
ညီလာခံပထမနေ့တွင် ပထမအကြိမ် စုံညီအ စည်းအဝေး၊ ကိုယ်စားလှယ်အဖွဲ့ခေါင်းဆောင်များဆွေးနွေးမှုဖိုရမ်၊ ကိုယ်စားလှယ်အဖွဲ့ခေါင်း ဆောင်များနှင့်ဆွေးနွေးဖက်နိုင်ငံ/အဖွဲ့အစည်းများကြား ဆွေးနွေးမှုဖိုရမ်တို့ကိုပြုလုပ်၍ ကော် မရှင်(အေ)၊ ကော်မရှင်(ဘီ)နှင့် ကော်မရှင်(စီ) အစည်းအဝေးများကို ကျင်းပခဲ့သည်။
ကော်မရှင်(အေ)နှင့် ကော်မရှင်(ဘီ) အစည်းအ ဝေးများတွင် မူးယစ်ဆေးဝါးမှောင်ခိုမှု၊ အကြမ်းဖက်မှု၊ လက်နက်မှောင်ခိုမှု၊ လူကုန်ကူးမှု၊ တောရိုင်းတိရိစ္ဆာန်ဆိုင်ရာပြစ်မှု၊ ပင်လယ်ရေကြောင်းဆိုင်ရာလိ-မ်လည်မှု၊ စီးပွားရေးဆိုင်ရာမှုခင်း၊ ဘဏ်မှုခင်းများ၊ ခရက်ဒစ်ကတ်လိ-မ်လည်မှု၊ ဆိုက်ဘာရာဇဝတ်မှု၊ ခရီးသွားစာရွက်စာတမ်း အတုပြုလုပ်မှုနှင့် နိုင်ငံဖြတ်ကျော်လိ-မ်လည်မှုတို့ကို ဆွေးနွေးခဲ့ကြသည်။
ထို့ပြင် ကော်မရှင်(စီ)အစည်းအဝေး၌ အီလက် ထရောနစ် Database စနစ်(e-ADS)အသုံးပြုရေး၊ မှုခင်းဆိုင်ရာကိစ္စများတွင် အပြန်အလှန် အကူအညီပေးရေး၊ အာဆီယံရဲအဖွဲ့များကြား အပြန်အလှန်လေ့ကျင့်သင်တန်းပေးရေးနှင့် အာဆီယံရဲအဖွဲ့ မှုခင်းသိပ္ပံကွန်ရက်တည်ထောင်ရေးတို့ကိုဆွေးနွေး၍ ကောင်မရှင်များအလိုက် ဆွေးနွေးခဲ့သည့် အကြောင်းအရာများကို ပူးတွဲကြေညာချက်(မူကြမ်း)ပြုစုမည်ဖြစ်သည်။
အဆိုပါ (၄၂)ကြိမ်မြောက် အာဆီယံရဲအဖွဲ့ညီ လာခံအား အောက်တိုဘာ ၂၃ ရက်နှင့် ၂၄ ရက်တို့တွင်လည်း ဆက်လက်ကျင်းပသွားမည်ဖြစ် ကြောင်း သိရသည်။
