အယ်ဟီလယ်နှင့် နေမာ လေ့ကျင့်ခန်း ပြန်ဆင်း
------------------------
ဒဏ်ရာကြောင့် ကာလရှည်ကြာ အနားယူနေရတဲ့ ဘရာဇီးတောင်ပံကစားသမား နေမာဟာ အယ်လ်အိန်းအသင်းနဲ့ ကစားမယ့်ပွဲစဉ်အတွက် အယ်ဟီလယ်အသင်းရဲ့ လေ့ကျင့်ရေးမှာ ပြန်လည်ပါဝင်လာနိုင်ခဲ့တာကို တွေ့ခဲ့ရပါတယ်။ အယ်ဟီလယ်အသင်းဟာ အာရှချန်ပီယံလိဂ်အုပ်စုပွဲစဉ်အဖြစ် အယ်လ်အိန်းအသင်းနဲ့ ကစားရမှာဖြစ်တာကြောင့် လေ့ကျင့်မှုတွေကို ကြိုတင်ပြုလုပ်နေခဲ့တာဖြစ်ပြီး နေမာလည်း ပါဝင်လာတာကို တွေ့ခဲ့ရတာပါ။
အသက်(၃၂)နှစ် အရွယ်ရှိနေပြီဖြစ်တဲ့ နေမာဟာ ပြီးခဲ့တဲ့နှစ် အောက်တိုဘာလက ကစားခဲ့တဲ့ ဥရုဂွေးအသင်းနဲ့ ကမ္ဘာ့ဖလားခြေစစ် ပွဲမှာ ဒူးဒဏ်ရာရခဲ့တာဖြစ်ပါတယ်။ ဒါကြောင့် ပြီးခဲ့တဲ့နှစ် နိုဝင်ဘာလတည်းက ခွဲစိတ်မှုခံယူခဲ့ ရတာဖြစ်ပြီး အခု အချိန်ထိ အနားယူနေခဲ့ရတာ ဖြစ်ပါတယ်။ အခုအချိန်မှာတော့ ဒဏ်ရာကနေ ပြန်လည်သက် သာလာပြီဖြစ်တာ ကြောင့် အယ်ဟီလယ်အသင်းရဲ့ လေ့ကျင့်ရေးတွေမှာ ပြန်လည်ပါဝင်လာခဲ့တာ ဖြစ်ပါတယ်။
နေမာဟာ (၂၀၂၃ )ခုနှစ်ကတည်းက ပီအက်စ်ဂျီအသင်းကနေ အယ်ဟီလယ်အသင်းကို ပြောင်းရွှေ့လာခဲ့တာဖြစ် ပြီး ဒဏ်ရာ ပြဿနာကြောင့် အသင်းအတွက် ပြိုင်ပွဲစုံ(၅)ပွဲသာ ကစားနိုင်ခဲ့တာဖြစ်ပါတယ်။
