YESC မြောက်ပိုင်းခရိုင်ရှိ မြို့နယ်(၅)ခုတွင် လျှပ်စစ်ဓာတ်တိုင်များလဲကျပျက်စီး
ရန်ကုန်တိုင်းအတွင်း အောက်တိုဘာ ၁၉ ရက်နှင့် ၂၀ ရက်တို့က လေပြင်းတိုက်ခတ်ပြီး မိုးသည်းထန်စွာရွာသွန်းခဲ့မှုကြောင့် ရန်ကုန်လျှပ်စစ်ဓာတ်အားပေးရေးကော်ပိုရေးရှင်း(YESC)၏ မြောက်ပိုင်းခရိုင်အတွင်းမှ မြို့နယ်(၅)ခုတွင် လျှပ်စစ် ဓာတ်အားပေးတိုင်များ လဲကျပျက်စီးခဲ့ကြောင်း သိရသည်။
YESC မြောက်ပိုင်းခရိုင်ကွပ်ကဲမှုအောက်ရှိ အင်းစိန်၊ မင်္ဂလာဒုံ၊ ရွှေပြည်သာ၊ ထောက်ကြန့်နှင့် လှည်းကူးမြို့နယ်တို့တွင် သစ်ပင်များလဲကျကာလျှပ်စစ်ဓာတ်အားလိုင်းတိုင်(၁၂)တိုင်ကျိုးပဲ့ပျက်စီးခဲ့ကြောင်း သိရသည်။
ထို့ပြင် ဓာတ်အားလိုင်းကြိုးများပြတ်ကျခြင်း၊ ကြွေသီးများကွဲခြင်း၊ မီတာများပျက်စီးခြင်း၊ ဓာတ်အားခွဲရုံအတွင်းရေများဝင်ရောက်ခြင်းများဖြစ်ပေါ်ခဲ့ကာ လျှပ်စစ်ဓာတ်အားယာယီပြတ်တောက်မှုများလည်းဖြစ်ပေါ်ခဲ့ကြောင်း သိရသည်။
ထို့ကြောင့် သက်ဆိုင်ရာမြို့နယ်အသီးသီးမှ တာဝန်ရှိသူများကစစ်ဆေးမှုများပြုလုပ်၍ လျှပ်စစ်ကျွမ်းကျင်ဝန်ထမ်းများက လျှပ်စစ်ဓာတ်အားအမြန်ဆုံးပြန်လည်ပို့လွှတ်ပေးနိုင်ရေးအတွက် ပျက်စီးဆုံးရှုံးမှုများအား ပြန်လည်ပြုပြင်လျက်ရှိကြောင်း သိရသည်။
