အင်္ဂလန်အသင်းတွင် ပါဝင်ခွင့်ရရန် နည်းပြသစ်တူဟယ်နှင့် ဂရင်းဝုဒ် ဆွေးနွေးလို
မာဆေးလ် တိုက်စစ်ကစားသမား မေဆန်ဂရင်းဝုဒ်ဟာ အင်္ဂလန်လက်ရွေးစင်အသင်းမှာ ပါဝင်ခွင့်ရဖို့ အတွက် နည်းပြသစ်တူဟယ်နဲ့ ဆွေးနွေးဖို့ ဆန္ဒရှိနေတယ်လို့ သိရပါတယ်။
ဂရင်းဝုဒ်ဟာ မာဆေးလ်မှာ ခြေစွမ်းပြနေပြီး မနေ့ညက ကစားခဲ့တဲ့ မွန့်ပယ်လီယာနဲ့ ပွဲစဉ်မှာလည်း တဂိုးထပ်သွင်းခဲ့တာကြောင့် စုစုပေါင်း ၈ ပွဲကစားအပြီးမှာ ၆ ဂိုးသွင်းယူထားပါတယ်။
ဂရင်းဝုဒ်ဟာ အင်္ဂလန်အသင်းမှာ ပြန်လည်ကစားခွင့်ရဖို့ အခွင့်အရေးအလွန်နည်းသွားပြီဆိုတာ သိရှိထားသည့်တိုင် နည်းပြတူဟယ်နဲ့ ပွင့်ပွင့်လင်းလင်း ဆွေးနွေးသွားဖို့ ဆန္ဒရှိနေတာပါ။
ဂရင်းဝုဒ်ဟာ အတူနေချစ်သူကို အတင်းအဓမ္မကျင့်မှု၊ နိုင်ထက်စီးနင်း ရိုက်နှက်မှုတွေကြောင့် အင်္ဂလန်မှာ အမှုဖွင့်ခံခဲ့ရပြီးနောက်ပိုင်းမှာ အမှုကနေ လွတ်မြောက်လာခဲ့သူပါ။
သူဟာ အနာဂတ်မှာ ကမ္ဘာ့ဖလားလို အဓိကပြိုင်ပွဲကြီးတွေမှာ ပါဝင်ကစားနိုင်ဖို့ ဆန္ဒရှိနေတာကြောင့် အင်္ဂလန်အသင်းမှာ ပါဝင်ခွင့်ရနိုင်ဦးမလားဆိုတာ နည်းပြတူဟယ်နဲ့ ဆွေးနွေးသွားချင်နေတာ ဖြစ်ပါတယ်။
DVB
