ကန့်ဘလူမြို့နယ်တွင် ယခုနှစ် ဆောင်းသီးနှံစိုက်ရာသီ၌ ဆီထွက် သီးနှံမျိုးစုံ ဧက (၂)သိန်းကျော် လျာထား စိုက်ပျိုးမည်
စစ်ကိုင်းတိုင်းဒေသကြီး၊ ကန့်ဘလူမြို့နယ်တွင် ယခုနှစ် ဆောင်းသီးနှံစိုက်ရာသီ၌ ဆီထွက်သီးနှံများ ဖြစ်သည့် မြေပဲ၊ နှမ်း၊ မုန်ညှင်း၊ နေကြာနှင့် ပန်းနှမ်းစသည့် သီးနှံမျိုးစုံ (၂၀၁၁၄၉) ဧကလျာထားစိုက်ပျိုးမည်ဖြစ်ကြောင်း မြို့နယ်စိုက်ပျိုးရေးဦးစီးဌာနမှ သိရသည်။
ကန့်ဘလူမြို့နယ်အတွင်း ဒေသခံတောင်သူများ ဆီထွက်သီးနှံစိုက်ပျိုးထုတ်လုပ်မှု တိုးတက်မြင့်မားရေး ဆီထွက်သီးနှံမျိုးစုံ အထွက်ကောင်း မျိုးကောင်း၊ မျိုးသန့်များ သုံးစွဲရေးနှင့် စိုက်စနစ်မှန်ကန်ရေး၊ ဒေသထွက် မြေဩဇာ အချိုးကျသုံးစွဲနိုင်ရေး မြို့နယ်စိုက်ပျိုးရေးဦးစီးဌာနမှလည်းဆောင်ရွက်ပေးလျက်ရှိကြောင်း သိရသည်။
ထို့ကြောင့် ဆီထွက်သီးနှံများ စီးပွားဖြစ်စိုက်ပျိုးနိုင်ရေး၊ ဆီထွက်သီးနှံများ အရည်အသွေးကောင်းရရှိရေး၊ နောက်ဆုံးပေါ် နည်းပညာများ ရယူသုံးစွဲနိုင်ရေးနှင့် ဈေးကွက်ဝင်ဆီထွက်သီးနှံများကို စိုက်ပျိုးကြရန် စည်းရုံးလျက်ရှိကြောင်း မြို့နယ်စိုက်ပျိုးရေးဦးစီးဌာနမှ သိရသည်။
ကန့်ဘလူမြို့နယ်တွင် ယခုနှစ် ဆောင်းသီးနှံစိုက်ပျိုးရာသီ၌ ဆီထွက်သီးနှံများ လျာထားစိုက်ပျိုးမှုအနေဖြင့် မြေပဲ (၉၅ ၂၆၈) ဧက၊ နှမ်း (၉၆၇၁၆) ဧက၊ မုန်ညှင်း (၅၆၃) ဧက၊ နေကြာ (၃၀၄၄) ဧကနှင့် ပန်းနှမ်း (၅၅၅၈) ဧက စုစုပေါင်း (၂၀ ၁၁၄၉) ဧကစိုက်ပျိုးမည်ဖြစ်ကြောင်း သိရသည်။
ထို့ကြောင့် မြို့နယ်အတွင်းသာမက ပြည်တွင်းစားသုံးဆီဖူလုံရေး သက်ဆိုင်ရာမိတ်ဖက်ဌာနများ၊ ဒေသခံ တောင်သူများနှင့် ပူးပေါင်း၍ အောင်မြင်အောင် အကောင်အထည်ဖော် စိုက်ပျိုးသွားမည်ဖြစ်ကြောင်း သိရသည်။
