သမိုင်းဝင်ဆံတော်ရှင် မြတ်မော်တင်စွန်းစေတီတော်၌ သီတင်းကျွတ်လပြည့်နေ့ ဆီမီး (၁၀၀၀) ထွန်းညှိပူဇော်ခြင်းနှင့် မီးပုံးပျံများ လွှတ်တင်ပူဇော်
ဧရာဝတီတိုင်းဒေသကြီး၊ ပုသိမ်ခရိုင်၊ ဟိုင်းကြီးကျွန်းမြို့ရှိ သမိုင်းဝင်ဆံတော်ရှင် မဟာမကုဋရံသီ မြတ်မော်တင်စွန်းစေတီတော်မြတ်ကြီးတွင် သီတင်းကျွတ်လပြည့် (အဘိဓမ္မာအခါတော်)နေ့၌ ဆီမီး (၁၀၀၀) ထွန်းညှိပူဇော်ခြင်းနှင့် မီးပုံးပျံများ လွှတ်တင်ပူဇော်ခဲ့ကြောင်း ဒေသခံများထံမှ သိရသည်။
သမိုင်းဝင်ဆံတော်ရှင် မြတ်မော်တင်စွန်း စေတီတော်မြတ်ကြီး၌ သီတင်းကျွတ်လပြည့်နေ့က မြို့နယ်အဆင့်ဌာနဆိုင်ရာများ၊ ဟိုင်းကြီးကျွန်းမြို့သူ၊ မြို့သားများနှင့် ရပ်ဝေးရပ်နီးမှ ဘုရားဖူးလာရောက်ကြသူများမှ ဆီမီး (၁၀၀၀)၊ ပန်း (၁၀၀၀) တို့ဖြင့် ကပ်လှူပူဇော်ကြပြီး မိဘမေတ္တာဆရာတော် သာသနဓဇဓမ္မာစရိယ နယ်လှည့်ဓမ္မာကထိက ဘဒ္ဒန္တတေ ဇောဘာသ (ဘိုကလေး) အရှင်သူမြတ်ထံမှ အနုမောဒနာတရား နာကြားခဲ့ကြောင်း သိရသည်။
ထိုနောက် ဘုရားဖူးလာရောက်ကြသူများက တာဝတိံသာနတ်ပြည်မှ လူ့ပြည်သို့ ပြန်လည်ကြွမြန်းတော်မူလာသည့် ဗုဒ္ဓမြတ်စွာဘုရားရှင်အား ရည်မှန်း၍ မီးပုံးပျံများ လွှတ်တင်ပူဇော်ခဲ့ကြကြောင်း သိရသည်။
ဟိုင်းကြီးကျွန်းမြို့သူ၊ မြို့သားများနှင့် ရပ်ဝေးရပ်နီးမှ လာရောက်သည့် ဘုရားဖူးဧည့်သည်များမှ သမိုင်းဝင်ဆံတော်ရှင် မဟာမကုဋရံသီမြတ်မော်တင်စွန်းစေတီတော်မြတ်ကြီးနှင့် ဟိုင်းကြီးကျွန်းမြို့ရှိ ဘုရား၊ စေတီ၊ ပုထိုးများအား ပန်း၊ ဆီမီး၊ သောက်တော်ရေချမ်း၊ အမွှေးနံ့သာများဖြင့် ကပ်လှူပူဇော်ခြင်းများ၊ ရွှေသင်္ကန်းများကပ်လှူခြင်း၊ ဝတ္ထုငွေများ ဆက်ကပ်လှူဒါန်းခြင်း၊ ဥပုသ်သီလစောင့်တည်ခြင်းတို့ဖြင့် ဟိုင်းကြီးကျွန်းမြို့၌ စည်ကားလျက်ရှိကြောင်း သိရသည်။
သီတင်းကျွတ်လပြည့်နေ့တွင် နိုင်ငံတစ်ဝန်းရှိ ပြည်သူများအနေဖြင့် ဘုရား၊ ပုထိုး၊ စေတီတို့၌ ကုသိုလ်ကောင်းမှုများ ပြုကြပြီး အထူးစည်ကားလျက်ရှိရာ ဒေသအသီးသီးတွင်လည်း ဘုရားဖူးခရီးသွားဧည့်သည့် ဝင်ရောက်မှု များပြားလျက်ရှိကြောင်း ဒေသတွင်း သတင်းများအရ သိရသည်။
