တံဆိပ်တုံးအတုဖြင့် နိုင်ငံကူးလက်မှတ်ကိုင်ဆောင်ထားပါက အမည်မည်းစာရင်းသွင်းမည်ဟု ကိုရီးယားနိုင်ငံဆိုင်ရာ မြန်မာသံရုံး ကြေညာ
တံဆိပ်တုံးအတုဖြင့် သက်တမ်းတိုးထားသည့် နိုင်ငံကူးလက်မှတ်ကို ကိုင်ဆောင်ထားပါက အမည်မည်းစာရင်းသွင်းမည်ဖြစ်ကြောင်း ဆိုးလ်မြို့ရှိ မြန်မာသံရုံးက ကြေညာထားသည်။
လက်ရှိတွင် အတုအပပြုလုပ်ထားသည့် တရားမဝင် တံဆိပ်တုံးများကို အသုံးပြု၍ နိုင်ငံကူးလက်မှတ် သက်တမ်းတိုးကိုင်ဆောင်နေခြင်းကို တွေ့နေရသည့်အတွက် တောင်ကိုးရီးယားရောက် မြန်မာနိုင်ငံသားများအနေဖြင့် တံဆိပ်တုံးအတုဖြင့် သက်တမ်းတိုးထားသည် နိုင်ငံကူးလက်မှတ်ကိုင်ဆောင်ခြင်းကို သတိပြုရှောင်ရှားနိုင်ရန်လည်း အသိပေးထားသည်။
ယင်း မြန်မာနိုင်ငံကူးလက်မှတ် ကိုင်ဆောင်အသုံးပြုရာတွင် သတိပြုရန် အချက်များကို လိုက်နာရန်နှင့် မသမာသူများ၏ စည်းရုံးသိမ်းသွင်းမှုကို သတိပြုရှောင်ရှားနိုင်စေရန် အသိပေးထုတ်ပြန်ခြင်းဖြစ်ကြောင်း သိရသည်။
မြန်မာနိုင်ငံသားများအနေဖြင့် နိုင်ငံကူးလက်မှတ် ကိုင်ဆောင်အသုံးပြုခြင်းဆိုင်ရာ စည်းကမ်းချက်များကို ဖောက်ဖျက်မိပါက မိခင်နိုင်ငံနှင့် အိမ်ရှင်နိုင်ငံတို့မှ ဥပဒေအရ အရေးယူခံရနိုင်ပြီး စိစစ်တွေ့ရှိပါက နိုင်ငံကူးလက်မှတ် ဖျက်သိမ်းခြင်းနှင့် အမည်မည်းစာရင်းသွင်းခြင်းကို လုပ်ဆောင်မည်ဖြစ်ကြောင်း သံရုံးကြေညာချက်အရ သိရသည်။
