ကျိုင်းတုံ-ပန်လီ-မိုင်းခုတ်-မိုင်းဆတ်လမ်းများ ပြုပြင်ပြီးဖြစ်၍ ယာဉ်များ ပုံမှန်အတိုင်းပြန်လည်သွားလာနိုင်ပြီ
ရှမ်းပြည်နယ်အရှေ့ပိုင်း၊ ကျိုင်းတုံမြို့နယ်အတွင်း သဘာဝဘေးကြောင့် တောင်ပြို၊ ပိတ်ဆိုခဲ့သည့် ကျိုင်းတုံ - ပန်လီ - မိုင်းခုတ် - မိုင်းဆတ်လမ်းများ လက်ရှိတွင် ပြန်လည်ပြုပြင်ပြီးဖြစ်၍ ယာဉ်များ ပုံမှန်အတိုင်း သွားလာနိုင်ပြီဖြစ်ကြောင်း ကျိုင်းတုံနှင့် မိုင်းဆတ်ခရိုင်လမ်းဦးစီးဌာနမှ သိရသည်။
စက်တင်ဘာ(၉) ရက်မှ (၁၂) ရက်အထိ မိုးအဆက်မပြတ်ရွာသွန်းမှုကြောင့် လမ်းအရှည် (၁၀၅) မိုင်၊ အကျယ် (၁၈) ပေရှိ ကျိုင်းတုံ- ပန်လီ-မိုင်းခုတ်-မိုင်းဆတ်သွားကားလမ်းပေါ်၌ တောင်ပြိုပြီး လမ်းပိတ်ဆို့မှုများ ဖြစ်ပေါ်ခဲ့ခြင်း ဖြစ်သည်။
ထိုသို့ လမ်းပိတ်ဆို့မှုဖြစ်ပေါ်ခဲ့သည့် နေရာများအား ဆောက်လုပ်ရေးဝန်ကြီးဌာန၊ ကျိုင်းတုံခရိုင်နှင့် မိုင်းဆတ်ခရိုင် လမ်းဦးစီးဌာနများမှ သက်ဆိုင်ရာလမ်းအပိုင်းအလိုက် စက်တင်ဘာ(၁၁) ရက်မှစတင်၍ ပြင်ဆင်ဆောင်ရွက်ခဲ့ရာ လက်ရှိတွင် ပြုပြင်ပြီးဖြစ်၍ မော်တော်ယာဉ်များ ပြန်လည်သွားလာနိုင်ပြီဖြစ်ကြောင်း သိရသည်။
အဆိုပါ လမ်းပိုင်း ပြန်လည်ပြုပြင်ဆောင်ရွက်ပြီးစီးမှုအခြေအနေများအား တြိဂံဒေသတိုင်းစစ်ဌာနချုပ်တိုင်းမှူး ဗိုလ်မှူးချုပ် စိုးလှိုင်နှင့် တာဝန်ရှိသူများက လာရောက်ကြည့်ရှုစစ်ဆေးပြီး လိုအပ်သည်များ ညှိနှိင်းဖြည့်ဆည်း ဆောင်ရွက်ပေးခဲ့ကြောင်းလည်း သိရသည်။
