DEMU ရထားပြေးဆွဲမည့် လမ်းကြောင်းများအတွက် ရထားဘူတာ ပလက်ဖောင်းများအား ထပ်မြှင့်နေ
ရန်ကုန် - ပဲခူးလမ်းပိုင်း၌ စမ်းသပ်ပြေးဆွဲနေသည့် စပိန်နိုင်ငံထုတ် Diesel Electric Multiple Unit (DEMU) ရထားတွဲဆိုင်းများအတွက် ရထားဘူတာ ပလက်ဖောင်းများကို မူလအမြင့်ထက်ထပ်မြှင့်နေကြောင်း သိရသည်။
“ဒီအောက်တိုဘာ အပြီး ပြင်ဆင်နေတာပါ”ဟု ယင်းလုပ်ငန်းများကို ဆောင်ရွက်ကာ ကန်ထရိုက်ရယူထားသည့် ကုမ္ပဏီက ပြည်တွင်း မီဒီယာတခုကို ဖြေကြားထားသည်။
ရထားစီး ခရီးသည်များ အခက်အခဲကြုံရမှုမရှိစေရန် မူလက အမြင့် (၄) ပေ ရှိသည့် ဘူတာပလက်ဖောင်းများအား နောက်ထပ် (၁) ခွဲထပ်မြှင့်နိုင်ရန် စီစဉ်ဆောင်ရွက်နေခြင်းဖြစ်ကြောင်းလည်း မြန်မာ့မီးရထားမှ သိရသည်။
ယခုကဲ့သို့ ရထားဘူတာများတွင် ပလက်ဖောင်းများ မြှင့်တင်ခြင်းသည် လာမည့် နိုဝင်ဘာလအတွင်း မြို့ပတ်အထူးရထားအဖြစ် ပြေးဆွဲသွားမည့် ရထားများအတွက်ပါ အဆင်ပြေစေရန် ပြင်ဆင်နေခြင်း ဖြစ်သည်ဟု ဆိုသည်။
ထို့ပြင် ခရီးဝေးပြေးဆွဲနိုင်သည့် တခြားစပိန်နိုင်ငံထုတ် ရထားတွဲဆိုင်းများကိုလည်း တင်သွင်းထားကာ ရထားဘူတာများကို လိုအပ်သည့် ပြင်ဆင်မှုများ ဆက်လက်လုပ်ဆောင်နေသည်ဟု မြန်မာ့မီးရထားနှင့် နီးစပ်သူတစ်ဦးက ဆိုသည်။
လက်ရှိတွင် ရန်ကုန် - ပဲခူး စမ်းသပ်ပြေးဆွဲနေသည့် အစုန်အဆန် ရထားကို လူထုအကြားစိတ်ဝင်စားမှုရှိနေပြီး အောက်တိုဘာ (၂)ရက်မှ (၁၀)ရက်အတွင်း စီးနင်းသူ ခရီးသည် (၁၄၂၁၆) ဦးရှိခဲ့ကြောင်း သိရသည်။
အဆိုပါ ရထားသည် ရန်ကုန်-ပဲခူး၊ ပဲခူး-ရန်ကုန်ခရီးစဉ်တွင် လမ်းခရီးတလျှောက်ရှိ ဘူတာ (၁၂) ခု၌ ရပ်တန့်ပေးမည်ဖြစ်ကာ ရထားလက်မှတ်ခ နှုန်းထားအနေဖြင့် ရန်ကုန်ဘူတာကြီးမှ ဒါးပိန် ဘူတာအထိ ခရီးတစ်ဝက်ကို (၁၃၀၀)ကျပ်၊ ခရီးစဉ်အစမှ အဆုံးထိ တစ်ဦးကို(၂၅၀၀) ကျပ် သတ်မှတ်ထားသည်။
ယင်း DEMU ရထားစတင်ပြေးဆွဲမှုအပေါ် ရထားစီးနင်းသူများလည်း စိတ်ဝင်စားမှုများပြားခဲ့ပြီး ရထားမပျက်စီးစေရန် ဝိုင်းဝန်းစည်းကမ်းရှိစွာ အသုံးပြုကြရန် မြန်မာ့မီး ရထားနှင့် သက်ဆိုင်သော လူမှုကွန်ရက်စာမျက်နှာများတွင် အကြံပြုရေးသားနေကြသည်။
