ဂျိမ်းစ်ဘွန်းရုပ်ရှင်ထဲက ကားကို ဒေါ်လာ ၁ သန်းပေးဝယ်ခဲ့တဲ့ အီလွန်မတ်စ်
_____________________

blind auction လေလံမှာ ကားအိုတစ်စီးကို ဒေါ်လာ ၁၀၀ နဲ့ ဝယ်မိခဲ့တဲ့ စုံတွဲတစ်တွဲဟာ ၂၅ နှစ်လောက်အကြာမှာ ဒီကားကို ဒေါ်လာ ၁ သန်းနီးနီး ပေးဝယ်မယ့်သူ တွေ့ခဲ့ပါတယ်။

၁၉၈၉ ခုနှစ်က နယူးယော့ခ်ပြည်နယ် လောင်းအိုင်းစ်လန်းက စုံတွဲတစ်တွဲဟာ blind auction လို့ ခေါ်တဲ့ ချိတ်ပိတ်ထားတဲ့ပစ္စည်း လေလံတစ်ခုမှာ ကားတစ်စီးကို ဒေါ်လာ ၁၀၀ နဲ့ လေလံဆွဲနိုင်ခဲ့ပါတယ်။ blind auction မှာက အထဲမှာ ဘာပစ္စည်းရှိမှန်း ရောင်းသူရော ဝယ်သူပါ မသိဘဲ စာအိတ်ထဲ ဈေး‌ပေးလေလံဆွဲတာမျိုးပါ။ ဈေးအမြင့်ဆုံးပေးသူ လေလံအောင်ပါတယ်။

စောင်ဟောင်းနဲ့ အုပ်ထားတဲ့ လေလံအောင်တဲ့ပစ္စည်းကို ဖွင့်ကြည့်ရာမှာတော့ ၁၉၇၆ မော်ဒယ် Lotus Esprit ပြိုင်ကားတစ်စီး ဖြစ်နေတာ တွေ့ခဲ့ရပါတယ်။ အံ့ဩဖို့ ကောင်းတာက ဒီကားက The Spy Who Loved Me ရုပ်ရှင်မှာ ဂျိမ်းစ်ဘွန်းမင်းသားကြီး ရော်ဂျာမိုးစီးခဲ့တဲ့ ကားဖြစ်နေတာပါ။

၁၉၇၇ ခုနှစ်က ဒီရုပ်ရှင်ထဲမှာ ရေငုပ်သင်္ဘောအဖြစ် ပုံစံပြောင်းပြီး ရေအောက်မှာတင် ဒုံးကျည်တွေ ပစ်နိုင်တဲ့ ကားဆိုပြီး နာမည်ကြီးခဲ့တဲ့ကားလည်း ဖြစ်ပါတယ်။ ပိုအံ့ဩဖို့ကောင်းပုံက ဒီကားကို လေလံအောင်တဲ့ စုံတွဲဟာ ဂျိမ်းစ်ဘွန်း ရုပ်ရှင်ကားတစ်ကားမှ မကြည့်ဖူးတာပါပဲ။

ဆောက်လုပ်ရေးပစ္စည်းအငှားလုပ်ငန်း လုပ်နေတဲ့ ဒီလင်မယားက ဒီကားအကြောင်း မသိခဲ့ပါဘူး။ Wet Nellie လို့ နာမည်ပြောင်ပေးထားတဲ့ ဒီကားဟာ ရုပ်ရှင်အတွက် ရေအောက်ထဲ သွားလို့ရအောင် ဒေါ်လာ ၁ သိန်းကျော် အကုန်အကျခံပြီး ပုံပြောင်းထားတာပါ။

လေလံတင်ရောင်းချိန်က ဒီကားမှာ ဘီးမပါဘဲ ရေယက်တွေပဲ ပါရှိပါတယ်။ ဒီကားက မြေပြင်မှာ မောင်းမရပေမယ့် ရေအောက်မှာ ကောင်းကောင်းကြီး မောင်းနှင်နိုင်စွမ်း ရှိပါတယ်။ နောက်တော့ ဒီကားကို အမိုးချိုင့်တာတွေ ပြင်ပြီး အမြင်လှအောင် ပြန်သ,ကာ ပြပွဲတွေ လုပ်ခဲ့ပါတယ်။ ၂၀၁၃ မှာတော့ ဒီကားကို လေလံတင်ခဲ့ပါတယ်။

ဒီကားအကြောင်း သတင်းကြားသွားတဲ့ အီလွန်မတ်စ်က RM Sotheby's ကို ဆက်သွယ်ပြီး လျှို့ဝှက်ဝယ်သူအနေနဲ့ ဒေါ်လာ ၉၉၇၀၀၀ ပေးဝယ်ခဲ့ပါတယ်။ ကလေးဘဝ တောင်အာဖရိကမှာတည်းက ဂျိမ်းစ်ဘွန်းကားတွေကို နှစ်ခြိုက်ခဲ့တဲ့ အီလွန်မတ်စ်ဟာ ခလုတ်တစ်ချက်နှိပ်ရုံနဲ့ ရေအောက်သွားယာဉ်ပြောင်းနိုင်တာကို စိတ်ဝင်စားတာ မဆန်းပါဘူး။

"ရုပ်ရှင်ထဲကလို တကယ်ပုံပြောင်းမသွားလို့ ကျွန်တော်စိတ်ပျက်သွားတယ်။ ကျွန်တော်က ဒါကို Tesla လျှပ်စစ်ပါဝါလိုင်းစနစ် နဲ့ အဆင့်မြှင့်ပြီး တကယ် ပုံပြောင်းအောင် လုပ်ချင်တာ" လို့ အဲ့ဒီတုန်းက မတ်စ်က ပြောဖူးပါတယ်။

ဒါပေမယ့်လည်း Lotus Esprit sport car ဟာ Cybertruck လို့ ဖြစ်လာမယ့် လျှပ်စစ်ထရပ်ကားရဲ့ ဒီဇိုင်းရှေ့ပြေး ဖြစ်ခဲ့ပါတယ်။ Cybertruck ဟာ Lotus ကားရဲ့ ဒီဇိုင်းကို ယူပြီး အဆင့်မြှင့်တင်ထားတာပါ။

၁၉၇၆ ထုတ် Lotus Esprit submarine က လေလံပွဲမှာ ဈေးအကြီးဆုံးကား ဂျိမ်းစ်ဘွန်းစီးခဲ့တဲ့ ကားမဟုတ်ပါဘူး။ ၁၉၆၅ ခုနှစ်က Thunderball ရုပ်ရှင်မှာ ပါခဲ့တဲ့ Aston Martin DB5 ဟာ ဒေါ်လာ ၆.၄ သန်းနဲ့ လေလံအောင်ထားပါတယ်။