"သီတင်းကျွတ်မီးထွန်းပွဲတော် ဓလေ့နဲ့ မြတ်ဗုဒ္ဓ အဘိဓမ္မာတရားတော် 💥💥💥

သီတင်းကျွတ်လပြည့်နေ့ဟာ မြန်မာလူမျိုးများအတွက် နေ့ထူးနေ့မြတ်ဖြစ်သလို အဘိဓမ္မာအခါတော်နေ့ဖြစ်ပြီး ဗုဒ္ဓဘာသာဝင်တို့ဟာ ဒီလိုအခါသမယမှာ မွန်မြတ်သော စိတ်နေသဘောထားနဲ့အတူ ဂါရဝေါစ၊ နိဝါတောစ တရားရှေ့ထားကာ မြတ်စွာဘုရားရှင် ဗျာဒိတ်ပညတ်တော်ထားခဲ့တဲ့အတိုင်း ကျင့်ကြံနေထိုင်ကြပါတယ်။

ရဟန်းသံဃာတော်များဝါဆိုပြီးနောက် သီတင်းသုံးတဲ့ နေရာများမှ လွတ်မြောက်ခဲ့ခြင်းကို ရည်ရွယ်ကာ ဝါကျွတ်ကန်တော့ပွဲဟုလဲခေါ်ဆိုပြီး ရတနာသုံးပါး၊ဘိုးဘွား၊မိဘ၊ဆရာသမား၊သက်ကြီးရွယ်အို တွေကို ပူဇော်ကန်တော့ခြင်း၊သံဃာတော်များအချင်းချင်း အဆုံးအမဩဝါဒ ခံယူကာ"ပဝါရဏာ” ပြုကြတယ်ဆိုတာက ဝါကျွတ်ကန်တော့ပွဲ အနှစ်သာရဖြစ်သလို မြန်မာတို့ရဲ့စေတနာ၊သဒ္ဓါတရားအလှ၊ မနောအလှ တစ်ခုလဲဖြစ်ပါတယ်။

မြတ်စွာဘုရားရှင်က မယ်တော်မိနတ်သားကို မွေးကျေးဇူးဆပ်တဲ့အနေနဲ့ တာဝတိံသာနတ်ပြည်မှာ ဝါတွင်းသုံးလပတ်လုံး အဘိဓမ္မာတရားတော်ကိုဟောကြားတော်မူပြီး သီတင်းကျွတ်လပြည့်နေ့မှာ နတ်ပြည်ကနေ လူ့ပြည်ကို ပြန်လည်ကြွချီတော်မူမည် သိသောအခါ သိကြားမင်းသည် ရွှေစောင်းတန်း၊ ငွေစောင်းတန်း၊ ပတ္တမြား စောင်းတန်းဆိုတဲ့ စောင်းတန်းသုံးသွယ် ဖန်ဆင်းတော်မူကာ နတ်၊ ဗြဟ္မာ အပေါင်းတို့နဲ့အတူ မြတ်စွာဘုရားရှင်က လူ့ပြည်ကို ကြွမြန်းတော်မူပါတယ်။

မြတ်စွာဘုရားရှင်မြင်းမိုရ်တောင်ထိပ်တွင် ရပ်တော်မူကာ ရေမီးအစုံ တန်ခိုး ပြာဋိဟာတို့ကို ပြတော်မူပြီး လူ့ပြည်မှာ ခြေတော်ကိုချတဲ့အခါ တပည့် သာဝကလက်ယာတော်ရံ ရှင်သာရိပုတ္တရာမထေရ်က အရင်ဆုံး ရှိခိုးကန်တော့ပြီးနောက် မင်း၊မိဖုရား၊ မှူးမတ်၊သာဝတ္ထိပြည်၊ဝေသာလီပြည်၊ရာဇဂြိုဟ်ပြည်၊ဗာရာဏသီပြည်များမှ တိုင်းသူပြည်သားအပေါင်းတို့က မီးရှူးတိုင်များ၊မီးပန်းများ၊ဆီမီးများနဲ့ မြတ်စွာဘုရားရှင်ကို ပူဇော်ကြိုဆိုကြပါတယ်။

အခုလို အကြောင်းတရားကို အခြေခံကာ သီတင်းကျွတ်လပြည့်နေ့ညတွင် ဆီမီးထွန်းညှိပူဇော်ခြင်း အလေ့အထ ဖြစ်လာခဲ့ရတာပါ။
နတ်ပြည်က စူဠာမဏိစေတီတော်ကို ပူဇော်တဲ့ အထိမ်းအမှတ်အဖြစ်လဲ မီးပုံးပျံများပြုလုပ်ကာ လွှတ်တင်ပူဇော်ကြပါတယ်။

ခေတ်ကာလတို့ တရွေ့ရွေ့ပြောင်းလဲခဲ့တဲ့နောက်မှာ သီတင်းကျွတ်မီးထွန်းပွဲတော်တွေလည်း ပုံသဏ္ဌာန်အမျိုးမျိုး၊နေရာဒေသ၊ခေတ်အခြေအနေအလိုက် တီထွင်ဆန်းသစ်ကျင်းပခဲ့ကြတာကိုတွေ့မြင်ကြရမှာပါ။ဒါကြောင့် အခုလာမယ့် မြန်မာ့ဆယ့်နှစ်လရာသီပွဲတော်ဖြစ်တဲ့ သီတင်းကျွတ် မီးထွန်းပွဲတော်ကိုလဲ အလှူဒါနများနဲ့အတူ ကြည်နူးပျော်ရွှင်စွာဆင်နွှဲနိုင်ကြပါစေလို့ တောင်းဆုပြုရင်း နှုတ်ဆက်လိုက်ရပါတယ်ခင်ဗျာ။

#ဓမ္မဒါန
#frankiestories