ဒေါ်လာဈေး ကျဆင်းလာမှုကြောင့် ပဲ/နှမ်း အရောင်းအဝယ်အေးပြီး ကျရိပ်မြင်လာ
ရန်ကုန်၊ အောက်တိုဘာ ၁၂
အမေရိကန်ဒေါ်လာငွေလဲနှုန်း ဆက်တိုက်ကျဆင်းလာမှုကြောင့် ပြည်တွင်း ပဲ/နှမ်း ဈေးကွက်အတွင်း အရောင်းအဝယ် အေးနေကြောင်း ပဲ၊ နှမ်း ကုန်သည်အသိုင်းအဝိုင်းကနေ သိရပါတယ်။
စက်တင်ဘာလမှာ ဖြစ်ပေါ်ခဲ့တဲ့ ရေကြီးရေလျှံမှုဖြစ်စဉ်၊ ပို့ကုန်အမယ် မြေပဲဆန်ကို တရုတ်လိုင်းရဲ့ အဝယ်မရှိသလောက် အခြေအနေတွေကြောင့်လည်း ပဲ/နှမ်းဈေးတွေ ကျရိပ်တွေ့နေရတယ်လို့ ဆိုပါတယ်။
မနေ့က ပြုလုပ်ခဲ့တဲ့ အမျိုးသားမဟာဗျူဟာ အစိုးရ-ပုဂ္ဂလိကပို့ကုန်မြှင့်တင်ရေးကော်မတီအစည်းအဝေးမှာ စီးပွား/ကူးသန်းဝန်ကြီး ဦးထွန်းအုံက ပဲမျိုးစုံနဲ့ ပြောင်းတင်ပို့မှုမှာ ပထမခြောက်လပတ် သတ်မှတ်လျာထားချက်ထက် ကျော်လွန်အောင် တင်ပို့နိုင်ခဲ့တယ်လို့ ပြောပါတယ်။
အခြားပို့ကုန်အမယ်တစ်ခုချင်းအလိုက် သတ်မှတ်လျာထားချက်တွေကို ပြည့်မီအောင် တင်ပို့နိုင်ဖို့ လိုအပ်နေတယ်လို့လည်း ၎င်းက ဆိုပါတယ်။
ဘုရင့်နောင်ကုန်စည်ဒိုင် (ရန်ကုန်) ရဲ့ အောက်တိုဘာ ၁၁ ရက်နေ့ ဈေးနှုန်းစာရင်းအရ မတ်ပဲ (FAQ/RC) တစ်တန် ကျပ် ၃၈ သိန်း၊ မတ်ပဲ (SQ/RC) တစ်တန် ကျပ် ၄၂ သိန်းဝန်းကျင်နဲ့ ပဲစဉ်းငုံနီ (RC) တစ်တန် ကျပ်သိန်း ၄၀ ပတ်ချာလည်နဲ့ ဈေးဖွင့်ခဲ့ပါတယ်။
စက်တင်ဘာ ၂၁ ရက်နေ့မှာ မတ်ပဲ (FAQ/RC) တစ်တန် ကျပ်သိန်း ၄၀ ကျော် ၊ မတ်ပဲ (SQ/RC) တစ်တန် ကျပ် ၄၄ သိန်းကျော်နဲ့ ပဲစဉ်းငုံနီ (RC) တစ်တန် ကျပ် ၄၉ သိန်းအထိ စံချိန်တင်မြင့်တက်ခဲ့ပြီးနောက် ပြန်လည်ကျဆင်းလာတာလည်း ဖြစ်ပါတယ်။
