တင်းနစ်ဂန္ထဝင် ရာဖေးလ် နာဒယ် ကစားသမားဘဝမှ အနားယူတော့မည်
အသက် ၃၈ နှစ်အရွယ် ဂရန်းဆလမ်း ၂၂ ဆုရှင် ရာဖေးလ် နာဒယ်ဟာ ဒီနှစ်ရာသီအကုန်မှာ တင်းနစ်လောကမှ အနားယူတော့မယ်ဆိုပြီး ကြေညာသွားပါတယ်။
လာမယ့် နိုဝင်ဘာလအတွင်း မာလာဂါမြို့မှာ ကျင်းပဖို့ရှိနေတဲ့ ဒေးဗစ်(စ်)ဖလား ပြိုင်ပွဲပြီးရင် ဒီတင်းနစ်ဂန္ထဝင်က ကစားသမားဘဝကို အပြီးတိုင် နှုတ်ဆက်တော့မှာပါ။
သက်ဆိုင်ရာ နိုင်ငံအလိုက် ယှဉ်ပြိုင်ကြရတဲ့ ဒီပြိုင်ပွဲမှာ နာဒယ်ဟာ စပိန်အသင်းအတွက် ကိုယ်စားပြုပြီး ၄ ကြိမ်တိတိ ချန်ပီယံဖြစ်အောင် စွမ်းဆောင်နိုင်ခဲ့ပါတယ်။
ဒါပေမဲ့လည်း လွန်ခဲ့တဲ့နှစ်ရာသီမှာ ဒဏ်ရာပြဿနာတွေနဲ့ ရင်ဆိုင်လာရတာကြောင့် အခုလိုမျိုး အပြီးတိုင်အနားယူဖို့ ဆုံးဖြတ်ခဲ့တာပါ။
အောက်တိုဘာ ၁၀ ရက်မှာ ထုတ်ပြန်ခဲ့တဲ့ ဗီဒီယိုမှတ်တမ်းအရ “အကန့်အသတ်တွေမရှိဘဲ ကျနော် ကစားနိုင်ဦးမယ်လို့ မထင်ပါဘူး” ဆိုပြီး နာဒယ်က ပြောကြားသွားပါတယ်။
ကမ္ဘာ့အဆင့်တစ် ကစားသမားဟောင်း နာဒယ်ဟာ သမိုင်းတလျှောက် တဦးချင်းပြိုင်ပွဲတွေမှာ ကာလကြာရှည် ပြိုင်ဘက်ဖြစ်တဲ့ နိုဗက်ခ် ဂျိုကိုဗစ် ပြီးရင် ဒုတိယအအောင်မြင်ဆုံး ဖြစ်ပါတယ်။
ဒါ့အပြင် “မြေစေကွင်းဘုရင်” ဆိုပြီး သိထားကြတဲ့အတိုင်း နာဒယ်ဟာ ပြင်သစ်အိုးပင်းပြိုင်ပွဲ မှာပါ ချန်ပီယံဆု ၁၄ ကြိမ်အထိ စံချိန်တင် ဆွတ်ခူးနိုင်ခဲ့သူ ဖြစ်ပါတယ်။
နာဒယ်ဟာ ယူအက်စ်အိုးပင်း ၄ ကြိမ် အပါအဝင် ဩစတြေးလျအိုးပင်းနဲ့ ဝင်ဘယ်လ်ဒန် ပြိုင်ပွဲမှာပါ ၂ ကြိမ်စီ အောင်မြင်မှုရရှိခဲ့သလို အိုလံပစ်ရွှေတံဆိပ်တွေလည်း ဆွတ်ခူးနိုင်ခဲ့ပါတယ်။
၂၀၀၀ ပြည့်နှစ်ရဲ့ အစောပိုင်းကာလတွေမှာ လက်ရှိကမ္ဘာ့အဆင့်တစ်ဖြစ်တဲ့ ဂျိုကိုဗစ်၊ ဂရန်းဆလမ်းအကြိမ် ၂၀ ဆုရှင် ရော်ဂျာ ဖက်ဒရာ တို့နဲ့အတူ နာဒယ်ဟာ “ကြီး-၃-ကြီး” ဆိုပြီး ခေတ်တခေတ် ထူထောင်နိုင်ခဲ့ကြသူတွေ ဖြစ်ပါတယ်။
DVB
