ဗိုလ်တထောင်ဘုရား ရွှေသင်္ကန်းကပ်လှူရန် တင်ဒါခေါ်
------------------
ရန်ကုန်မြို့၊ ဗိုလ်တထောင်ကျိုက်ဒေးအပ်ဆံတော်ဦး စေတီတော်မြတ်ကြီးကို လုံးတော်ပြည့် ရွှေသင်္ကန်းကပ်လှူဖို့ တင်ဒါခေါ်ယူနေတယ်လို့ ဗိုလ်တထောင်ကျိုက်ဒေးအပ်ဆံတော်ဦးစေတီတော် ဘဏ္ဍာတော်ထိန်းဂေါပကအဖွဲ့ ကနေ သိရပါတယ်၊၊
လျှောက်လွှာတစ်စုံကို ငွေကျပ် ၃ သောင်းနဲ့ ဝယ်ယူနိုင်ပြီး စျေးပြိုင်တင်ဒါတင်သွင်းနိုင်ကာ အောက်တိုဘာလ ၂၀ ရက် ညနေ ၄ နာရီခွဲအချိန် နောက်ဆုံးထားပြီး လျှောက်လွှာတွေကို ဘဏ္ဍာတော်ထိန်း ဂေါပကအဖွဲ့ရုံးမှာ တင်သွင်းရမှာ ဖြစ်တယ်လို့ ဆိုပါတယ်၊၊
စေတီတော်မြတ်ကြီးကို လုံးတော်ပြည့် ရွှေသင်္ကန်း ကပ်လှူရာမှာ ၉ လက်မပတ်လည် ရွှေစင်ရွှေပြား ကပ်လှူတဲ့ လုပ်ငန်း၊ စေတီတော်ကြီး နဲ့ အရံစေတီတွေ ရင်ပြင်တော်ရှိ စေတီတွေကို ရွှေသင်္ကန်းကပ်လှူတဲ့ လက်ခလုပ်ငန်းနဲ့ ၂ လက်မ ပတ်လည် ရွက်ရေ (၁၀၀) ပါ ရွှေဆိုင်း ၇၅၀၀ ဆိုင်း တင်သွင်းတဲ့လုပ်ငန်းတွေကို ဆောင်ရွက်သွားမှာ ဖြစ်တယ်လို့ သိရပါတယ်၊၊
