နိုင်ငံအသီးသီးရှိ မြန်မာရွှေ့ပြောင်းအလုပ်သမားများအတွက် IOM နှင့် အလုပ်သမားဝန်ကြီးတို့ ဆွေးနွေး
ပြည်ပနိုင်ငံအသီးသီး၌ အလုပ်လုပ်ကိုင်နေရသည့် မြန်မာရွှေ့ပြောင်းအလုပ်သမားများအတွက် အကူအညီပေးနိုင်ရေး ရွှေ့ပြောင်းသွားလာနေထိုင်ခြင်းဆိုင်ရာ နိုင်ငံတကာအဖွဲ့အစည်း (IOM) နှင့် အလုပ်သမားဝန်ကြီးဌာန ပြည်ထောင်စုဝန်ကြီးတို့ ဆွေးနွေးခဲ့ကြသည်။
နေပြည်တော်ရှိ အလုပ်သမားဝန်ကြီးဌာနတွင် အောက်တိုဘာ (၉)ရက်က IOM ၏ Chief of Mission ဖြစ်သူ Mr. Daihei Mochizuki ဦးဆောင်သော အဖွဲ့ကို လက်ခံတွေ့ဆုံစဉ် ယင်းသို့ဆွေးနွေးခြင်း ဖြစ်သည်။
ဆွေးနွေးချက်များတွင် မြန်မာရွှေ့ပြောင်းအလုပ်သမားများ လုံခြုံစိတ်ချစွာ ရွှေ့ပြောင်းလုပ်ကိုင်နိုင်ရေး၊ လူမှုကာကွယ်စောင့်ရှောက်မှုပေးနိုင်ရေး၊ ရွှေ့ပြောင်းအလုပ်သမားများအား လူသားချင်းစာနာထောက်ထားမှု အကူအညီများ ဆောင်ရွက်ပေးနိုင်ရေး အပါအဝင် အလုပ်သမားရေးရာ ကိစ္စရပ်များ ပူးပေါင်းဆောင်ရွက်နိုင်ရေးအတွက် MoU လက်မှတ်ရေးထိုးရေးကိစ္စရပ်များနှင့် အလုပ်သမားဝန်ကြီးဌာနနှင့် IOM တို့ ပူးပေါင်းပြီး နိုင်ငံတကာလုပ်သားများ ရွှေ့ပြောင်းသွားလာခြင်း စီမံခန့်ခွဲမှုဆိုင်ရာကိစ္စရပ်များလည်း ပါဝင်ကြောင်း သိရသည်။
