အင်နီယေစတာနှုတ်ဆက်ပွဲ ဘာစီလိုနာ၌ ပြုလုပ်
---------------------
စပိန်လက်ရွေးစင်အသင်း၊ ဘာစီလိုနာအသင်းတွေနဲ့အတူ အောင်မြင်မှုတွေရခဲ့တဲ့ ကွင်းလယ်လူ အင်နီယေစတာရဲ့ နှုတ်ဆက်ပွဲကို အောက်တိုဘာ ၈ ရက်က ဘာစီလိုနာမြို့မှာ ပြုလုပ်ခဲ့ပါတယ်။ အသက် ၄၀ အရွယ် အင်နီယေ စတာဟာ ကစားသမားဘဝ ၂၄ နှစ်တာကာလအတွင်း စပိန်လက်ရွေးစင်အသင်းအတွက် ကမ္ဘာ့ဖလားနဲ့ ယူရို ချန်ပီယံဆုတွေအပါအဝင် အောင်မြင်မှုတွေရခဲ့သလို ဘာစီလိုနာအသင်းနဲ့လည်း လာလီဂါနဲ့ ချန်ပီယံလိဂ် ဆုဖလားတွေ ရယူနိုင်ခဲ့တာပါ။
ယူအေအီးကလပ် အမ်းမရိတ်စ်အသင်းမှာ နောက်ဆုံးကစားခဲ့ပြီးနောက် ကစားသမားဘဝကနေ အနားယူဖို့ ဆုံးဖြတ်ခဲ့တဲ့ အင်နီယေစတာက ခက်ခဲတဲ့ဆုံးဖြတ်ချက်ဖြစ်သလို ဘောလုံး ကစားတာကို အမြဲတမ်းသတိရနေမှာ ဖြစ်တယ်လို့ ပြောသွားခဲ့ပါတယ်။ ဘောလုံးနဲ့အဝေးမှာ မနေနိုင်တဲ့အတွက် နည်းပြအဖြစ်နဲ့ ဘောလုံးလောကထဲကို ပြန်ရောက်လာနိုင်ဖွယ်ရှိတယ်လို့လည်း အင်နီယေစတာက ပြောသွားခဲ့ ပါတယ်။
အင်နီယေစတာရဲ့ နှုတ်ဆက်ပွဲကို ဘာစီလိုနာအသင်း တာဝန်ရှိသူတွေအပြင် ဂါဗီနဲ့ ဖာတီတို့လို ဘာစီလိုနာကစားသမားတွေပါ တက်ရောက်လာခဲ့တာကို တွေ့ရပါတယ်။ အင်နီယေစတာရဲ့ ဘာစီလိုနာ အသင်းဖော်ဟောင်း မက်ဆီကလည်း စပိန်ဘောလုံးလောကရဲ့ အကောင်းဆုံးကစားသမားတစ်ယောက်လို့ လူမှုကွန်ရက်မှာ အင်နီယေစတာကို ချီးကျူးသွားခဲ့ပါတယ်။
