ကင်ဆာကုသရေးဌာနဖွင့်လှစ်ပြီးလျှင် လူနာ ၂၀၀ ထိ တိုးချဲ့ကုသနိုင်မည်
-------------------------
ရန်ကုန်တိုင်းဒေသကြီး၊ ဒဂုံဆိပ်ကမ်းမြို့နယ်ရှိ အမျိုးသားကင်ဆာရောဂါကုသရေးဌာနမှာ ဓာတ်ရောင်ခြည် ကင်ဆာရောဂါကုသစက်နှစ်လုံး တပ်ဆင်ပြီးရင် အခုနှစ် ဒီဇင်ဘာလကစပြီး တစ်ရက်ကို လူနာ ၂၀၀ လောက် အထိ ကုသပေးနိုင်မှာ ဖြစ်တယ်လို့ ကျန်းမာရေးဝန်ကြီးဌာနက သိရပါတယ်။
အမျိုးသား ကင်ဆာရောဂါကုသရေး ဌာနမှာ အခုအခါ ဓာတ်ရောင်ခြည်ကုသစက်တွေနဲ့အတူ တွဲဖက် အသုံးပြုရမယ့် ဓာတ်ရောင်ခြည်နဲ့ ကုသမှု အထောက်အကူပြုစက်(CT Simulator)တပ်ဆင်တဲ့ လုပ်ငန်းဆောင်ရွက်နေပြီး မကြာမီပြီးစီးမှာ ဖြစ်တဲ့အတွက် အောက်တိုဘာလ တတိယပတ်ကစပြီး လက်တွေ့ သင်ကြားကုသမှု စတင်နိုင်မှာဖြစ်တယ်လို့ ဆိုပါတယ်၊၊
အဲဒီနောက် လူနာသစ်တွေကို ကုသမှုပေးနိုင်ဖို့ စီစဉ်နေပြီး အခုတပ်ဆင်ပြီးဖြစ်တဲ့ ဓာတ်ရောင်ခြည်နဲ့ ကင်ဆာ ရောဂါကုသစက်အသစ် Linear Accelerator နဲ့ တစ်ရက်ကို ကင်ဆာလူနာ ၅၀ ကနေ ၁၀၀ အထိ ကုသမှု ပေးနိုင်မှာဖြစ်သလို ထပ်မံပြီး ဓာတ်ရောင်ခြည်နဲ့ ကင်ဆာရောဂါကုသစက်သစ်နှစ်လုံး တပ်ဆင်ပြီးရင် အခုနှစ် ဒီဇင်ဘာလကစတင်ပြီး တစ်ရက်ကို စုစုပေါင်းလူနာ ၂၀၀ အထိ ဓာတ်ရောင်ခြည်နဲ့ ကုသပေးနိုင်တော့မှာ ဖြစ်တယ်လို့ သိရပါတယ်၊၊
ဒါ့အပြင် ရန်ကုန်မြို့ လမ်းမတော်မြို့နယ်မှာ တည်ဆောက်နေတဲ့ အထူးကုဆေးရုံ သစ်ကြီး(ရန်ကုန်) တည်ဆောက်ရေး စီမံကိန်းပြီးစီးရင်လည်း နိုင်ငံတကာအဆင့်မီ ဆေးရုံဒီဇိုင်းနဲ့ ဆေးရုံသုံး ပစ္စည်းတွေပါဝင်တဲ့ နှလုံး၊ ဦးနှောက်နဲ့ အာရုံကြော အထူးကုဆေးရုံကြီးအဖြစ် ရပ်တည်ကာ ပြည်သူတွေကို အရည်အသွေးပြည့် ကျန်းမာရေး စောက်ရှောက်ရေးလုပ်ငန်းတွေ ပိုမိုဆောင်ရွက်နိုင်မှာ ဖြစ်တယ်လို့ သိရပါတယ်၊၊
