လှပစွာ လက်လွှတ်တတ်ခြင်းဟာ ကိုယ့်ကိုယ်ကို လွတ်မြောက်စေခြင်းပဲ။
ChuElla es Chu2024-10-09 11:36:47
ဘယ်နှောင်ကြိုးကမှ လူတစ်ယောက်ကို ပိုင်ဆိုင်အောင် မချည်နိုင်ဘူး။
သက်ဆိုင်ခြင်းဟာ ပိုင်ဆိုင်ခြင်းနဲ့ ထပ်တူညီမကျဘူး။
မသက်ဆိုင်ချင်တော့သူတစ်ဦးကို အတင်းအဓမ္မ ဖိအားပေးပြီး ငါ့လူလို့ သတ်မှတ်ခြင်းဟာ ရေရှည်မှာ တဖက်လူထက် ကိုယ့်ကိုယ်ကိုသာ နစ်မွန်းစေတာ။
လူတစ်ဦးက သူ့ကို ပိုင်ဆိုင်ခွင့် ကျေကျေနပ်နပ် ပေးမလာသရွေ့ ကိုယ်က သက်ဆိုင်သူသက်သက်ပဲ။
ပိုင်ဆိုင်ခွင့်ဆိုတာကလည်း ပေးထားရင်တောင်မှ ဘယ်အချိန်မဆို ပြန်ရုပ်သိမ်းသွားလို့ ရတယ်… သူ့ဘဝဖြစ်နေတာကိုး။
သံယောဇဉ်တွေ၊ အချိန်ကုန်တာတွေ၊ နစ်နာတာတွေ ကြိုက်သလောက် ပြောလို့ရတယ်။
ဒါပေမယ့် လူတစ်ယောက်က တခြားတစ်ဦးရဲ့ ဘဝထဲကနေ သူထွက်သွားချင်တဲ့အချိန် ထွက်သွားလို့ရတယ်ဆိုတာက အမှန်တရားပဲ။
အဲ့တာကို လက်ခံပြီး နေထိုင်ခြင်းက မိမိကိုယ်ကို ချစ်ခင်အလေးထားခြင်းပဲ။
ကိုယ်လည်း သံယောဇဉ်အမျိုးမျိုးကို လက်လွှတ်ဖူးတာမလို့ ဘယ်လောက် နာကျင်ရလဲ သိတာပေါ့။
အမှန်တရားကတော့ မနေချင်တော့သူကို အတင်းဆွဲထားတဲ့အခါ ဖြစ်လာသမျှ နောက်ဆက်တွဲတိုင်းက ကိုယ့်တာဝန်ပါပဲ။
