ဖိလစ်ပိုင်သမ္မတဟောင်း ဒူတာတေး မြို့တော်ဝန်နေရာ ဝင်ပြိုင်မည်
---------------------------
ဖိလစ်ပိုင် သမ္မတဟောင်း ရိုဒရီဂို ဒူတာတေးဟာ နိုင်ငံတောင်ပိုင်း ဒါဗောင်းမြို့ရဲ့ လာမဲ့ ၂၀၂၅ ခုနှစ် မြို့တော်ဝန် ရွေးကောက်ပွဲမှာ ဝင်ရောက်ယှဉ်ပြိုင်သွားမှာဖြစ်တယ်လို့ ရိုက်တာ သတင်းမှာ ဖော်ပြထားပါတယ်။ အဲဒီမြို့ဟာ သူသမ္မတမဖြစ်ခင်က နှစ်(၂၀)ကြာ မြို့တော်ဝန်လုပ်ခဲ့ဖူးတဲ့ သူရဲ့ အမာခံနယ်မြေဖြစ်ပါတယ်။
အသက် (၇၉) နှစ် ရှိပြီဖြစ်တဲ့ ဒူတာတေးဟာ ဒါဗောင်းမြို့ ရွေးကောက်ပွဲကော်မရှင်ရုံးမှာ ကိုယ်စား လှယ်လောင်း လျှောက်လွှာကို တနင်္လာနေ့က သွားရောက် တင်သွင်းခဲ့ပါတယ်။ အဲဒီလို တင်သွင်းပြီးနောက် သတင်းထောက် တွေနဲ့ တွေ့ဆုံရာမှာ ဒူတာတေးက ပြည်သူကို အလုပ်အကျွေးပြုချင်တယ်လို့ ပြောသွားခဲ့ပါတယ်။ လက်ရှိ ဒါဗောင်းမြို့တော်ဝန်ဟာ သူရဲ့သား ဆီဘတ်စ် တီယန်း ဒူတာတေးဖြစ်ပါတယ်။
ဒါဗောင်းမြို့ဟာ ဒူတာတေး မိသားစုရဲ့ ခြေကုပ်ရရှိထားရာ မြို့ဖြစ်ပြီး ဒူတာတေးဟာ သမ္မတအဖြစ် တာဝန်ထမ်း စဉ်က ဆင်နွှဲခဲ့တဲ့ မူးယစ်ဆေးဝါးစစ်ပွဲအတွင်း လူထောင်ချီ သေဆုံးခဲ့ရမှုအတွက် ပြည်တွင်းပြည်ပ စုံစမ်းစစ်ဆေးမှု တွေနဲ့လည်း ရင်ဆိုင်နေရသူဖြစ်ပါတယ်။ နိုင်ငံတကာ ရာဇဝတ်တရားရုံး(ICC)က ရှေ့နေတွေရဲ့ ခန့်မှန်းချက်အရ သူရဲ့သမ္မတ သက်တမ်းအတွင်း မူးယစ်ဆေးဝါး နှိမ်နင်းရေး ခေါင်းစဉ်အောက်မှာ အသက်ပျောက်ခဲ့ရသူ အရေ အတွက်ဟာ လူ(၆၀၀၀)ကျော် ရှိမယ်လို့ ဆိုပါတယ်။
