မြန်မာ့လက်ဖက်အစိုကို ပြည်ပတင်ပို့ရောင်းချမှု များလာနိုင်
----------------------------
မြန်မာ့လက်ဖက်အစိုကို ပြည်ပတင်ပို့ရောင်းချမှု များလာနိုင်တယ်လို့ မြန်မာနိုင်ငံလက်ဖက်စိုက်ပျိုး ထုတ်လုပ် တင်ပို့ရောင်းချသူများအသင်းက သိရပါတယ်။ ပြည်ပနိုင်ငံတွေကို မြန်မာနိုင်ငံကထွက်ရှိတဲ့ လက်ဖက်အချို ခြောက်၊ လက်ဖက်အခါးခြောက်ကို တင်ပို့ ရောင်းချလာတာကြာပြီ ဖြစ်ပေမဲ့ လက်ဖက်အစိုကတော့ လွန်ခဲ့တဲ့ ၂၀၁၅ ခုနှစ်မှ စတင်ကာ တင်ပို့ရောင်းချနေတာ ဖြစ်ပြီး တစ်နှစ်ကို လက်ဖက်တန်ချိန် ၂၀ နီးပါး တင်ပို့ ရောင်းချ နေတယ်လို့ သိရပါတယ်။
မြန်မာနိုင်ငံမှာ လက်ဖက်အစိုယဉ်ကျေးမှုက အစကတည်းရှိနေတာဖြစ်တဲ့အတွက် နိုင်ငံတကာနဲ့ယှဉ်ပြိုင်ရတာ ပိုပြီး အဆင်ပြေတယ်လို့ မြန်မာနိုင်ငံလက်ဖက် စိုက်ပျိုးထုတ်လုပ်တင်ပို့ရောင်းချသူများအသင်း၊ အတွင်းရေးမှူး ဦးလင်းပြည့်ထွန်းက ပြောပါတယ်။
နိုင်ငံတကာကို တင်ပို့ရောင်းချနိုင်မှုတွေ များလာစေဖို့အတွက် လက်ဖက်ပင် စိုက်ပျိုးထုတ်လုပ်မှုတွေကိုလည်း တိုးချဲ့လုပ်ကိုင်ဖို့ လိုပြီး မြန်မာနိုင်ငံအတွင်းက လက်ဖက်ပင်တွေဟာ ရာသီဥတုအခြေအနေတွေကြောင့် ပျက်စီးမှု တွေ များပြားလာနေတဲ့အတွက် အပင်တွေကို ပြုပြင်ထိန်းသိမ်းဖို့ လိုအပ်နေတယ်လို့ ဆိုပါတယ်။
လက်ဖက်စိုက်ပျိုးထုတ်လုပ်သူတွေမှာလည်း အခုအချိန်မှာ အခက်အခဲတွေနဲ့ ကြုံနေရတယ်လို့ လက်ဖက်စိုက် တောင်သူ ကိုစိုင်းကောင်းခမ့်က ပြောပါတယ်။ လက်ရှိအချိန်မှာဆိုရင် မြန်မာနိုင်ငံက လက်ဖက်ထွက်ရှိမှုရဲ့ ရာခိုင်နှုန်း ၈၀ ကို ပြည်တွင်းဈေးကွက်မှာသာ ရောင်းချနေတာဖြစ်ပြီး ကျန်တဲ့ ၂၀ ရာခိုင်နှုန်းကို အော်ဂဲနစ် ထုတ်ကုန်အဖြစ် ထုတ်လုပ်ပြီး ၁၀ ရာခိုင်နှုန်းကိုသာ ပြည်ပဈေးကွက်ကို တင်ပို့ ရောင်းချနိုင်သေးတယ်လို့ သိရပါတယ်။
