ဖလော်ရီဒါသို့ အင်အားပြင်း ဟာရီကိန်း မီလ်တန် ဝင်ရန်ရှိနေ
-------------------
သိပ်မကြာသေးခင်ကမှ ဟာရီကိန်း ဟယ်လန်နဲ့ ရင်ဆိုင်ခဲ့ရတဲ့ ဖလော်ရီဒါပြည်နယ်ကို နောက်ထပ် ဟာရီကိန်း မီလ်တန်ဟာ အခုအပတ်တွင်းမှာ ဝင်ရောက်မယ်လို့ မိုးလေဝသကျွမ်းကျင်သူတွေက ခန့်မှန်းနေကြပါတယ်။ အဲဒီ ဟာရီကိန်း မီလ်တန်ဟာ တနင်္ဂနွေနေ့က အင်အား အဆင့်(၁)ရှိတဲ့ ဟာရီကိန်းအဖြစ် အားကောင်းလာခဲ့တယ်လို့ CNN သတင်းမှာ ဖော်ပြထားပါတယ်။
ဖလော်ရီဒါပြည်နယ်ထဲက လူနေမြို့ရွာတွေမှာ ဟာရီကိန်း ဟယ်လန် ဝင်မွှေ သွားပြီးနောက် ကျန်ရစ်ခဲ့တဲ့ အပျက် အစီးပုံတွေကို ရှင်းလင်းရေး လုပ်နေပြီး ပြန်လည်ထူထောင်ဖို့ အားယူနေဆဲ ဖြစ်ပါတယ်။ တနင်္ဂနွေနေ့ ဒေသစံ တော်ချိန် ည(၁၁) နာရီခန့်က တိုင်းထွာချက်အရ ဟာရီကိန်း မီလ်တန်ဟာ လေတိုက်နှုန်း တနာရီကို မိုင်(၉၀) ရှိနေပြီး ဖလော်ရီဒါပြည်နယ် တမ်းပါးမြို့ရဲ့ အနောက်နဲ့ အနောက်တောင်ပိုင်း မိုင် (၇၀၀)ကျော်မှာ တစ်နာရီကို (၇)မိုင်နှုန်းနဲ့ ရှေ့တိုးရွေ့လျားနေပါတယ်။
အဲဒီလိုရွေ့လျားရင်း ဗုဒ္ဓဟူးနေ့ လောက်မှာ အင်အား အဆင့်(၃)ရှိတဲ့ ဖျက်အားပြင်း ဟာရီကိန်းအဖြစ်နဲ့ ဖလော်ရီဒါ ကမ်းခြေကနေ ကုန်းတွင်းပိုင်း ကို စတင်ဝင်ရောက်မယ်လို့ ခန့်မှန်းရပါတယ်။ ကုန်းတွင်းပိုင်းကို ဝင်ရောက်ချိန်မှာ တစ်နာရီလေတိုက်နှုန်း မိုင် (၁၂၀) ရှိမယ်လို့လည်း ခန့်မှန်းထားကြပါတယ်။
