EV ယာဉ်အမျိုးမျိုး တပ်ဆင်ထုတ်လုပ်မည့် ရင်းနှီးမြှုပ်နှံမှု MIC ထပ်မံခွင့်ပြုပေး

ရန်ကုန်၊ အောက်တိုဘာ ၁

မြန်မာနိုင်ငံရင်းနှီးမြှုပ်နှံမှုကော်မရှင် (MIC) က နိုင်ငံအတွင်းမှာ လျှပ်စစ်သုံးယာဉ်အမျိုးမျိုး တပ်ဆင်ထုတ်လုပ်မယ့် ရင်းနှီးမြှုပ်နှံမှု လုပ်ငန်းအသစ်တစ်ခုကို ထပ်မံခွင့်ပြုကြောင်း ၈/၂၀၂၄ ကြိမ်မြောက်အစည်းအဝေးမှာ ဆုံးဖြတ်ခဲ့ပါတယ်။

အမေရိကန်ဒေါ်လာ ၉.၂၅၅ သန်းနဲ့ ကျပ်သန်းပေါင်း ၄၆,၀၀၀ ကျော် ပမာဏရှိတဲ့ ရင်းနှီးမြှုပ်နှံမှုလုပ်ငန်းသစ် ၈ ခု ခွင့်ပြုခဲ့တဲ့အထဲမှာ EV တပ်ဆင်ထုတ်လုပ်တဲ့ လုပ်ငန်းလည်း တစ်ခုအပါအဝင် ဖြစ်ပါတယ်။

MIC အစည်းအဝေးမှတ်တမ်းတွေအရ ဆောင်ရွက်ဆဲ ရင်းနှီးမြှုပ်နှံမှုလုပ်ငန်းတွေရဲ့ မတည်ငွေရင်းတိုးမြှင့်ခြင်းတွေ အပါအဝင် စက်မှုကဏ္ဍ၊ ဝန်ဆောင်မှုကဏ္ဍ၊ ရေနံနှင့် သဘာဝဓာတ်ငွေ့ကဏ္ဍနဲ့ ပို့ဆောင်ရေးနှင့် ဆက်သွယ်ရေးကဏ္ဍတို့မှာ ဝင်ရောက်ရင်းနှီးမြှုပ်နှံသွားမှာပါ။

ဘက်ထရီလျှပ်စစ်သုံးယာဉ် (BEV) တွေ၊ ၎င်းရဲ့ ဆက်စပ်ပစ္စည်းတွေ၊ အားသွင်းရုံဆိုင်ရာ ပစ္စည်းတွေနဲ့ အားသွင်းစနစ်ဆိုင်ရာ ပစ္စည်းတွေ ပြည်ပကနေ တင်သွင်းခြင်း၊ ပြည်တွင်းမှာ ထုတ်လုပ်ရောင်းချခြင်းနဲ့ ဝယ်ယူရောင်းချခြင်းတွေအပေါ် ကုန်သွယ်လုပ်ငန်းခွန် ကင်းလွတ်ခွင့်ပေးထားပါတယ်။

လက်ရှိမှာ နိုင်ငံခြားသုံးစွဲမှုကို စီးထွက်မှုကို ထိန်းချုပ်လိုတာကြောင့် ပြည်ပကနေ လျှပ်စစ်ယာဉ် (EV) တင်သွင်းခြင်းတွေကို ဦးစားပေးအဆင့်မှ လျှော့ချသတ်မှတ်ထားကြောင်း မော်တော်ယာဉ်လုပ်ငန်းရှင်အသိုင်းအဝိုင်းကနေ သိရပါတယ်။

ပြည်တွင်းကို လျှပ်စစ်ကားများတင်သွင်းရောင်းချခြင်းအတွက် ကုမ္ပဏီ ၁၀၀ ကျော်ကို တရားဝင်တင်သွင်းရောင်းချခွင့်ပြုထားပြီး အဲဒိအထဲက ကုမ္ပဏီအချို့ကပဲ တင်သွင်းရောင်းချနေကာ အများစုကတော့ တင်သွင်းရောင်းချခြင်း မပြုနိုင်သေးပါဘူး။

ပြီးခဲ့တဲ့နှစ်က သုံးဘီးယာဉ်တွေ၊ ဆိုင်ကယ်တွေကို အဓိကတင်သွင်းခဲ့ကြပြီး EV လူစီး၊ အိမ်စီးကား နှစ်ထောင်ဝန်းကျင်သာ အများဆုံးတင်သွင်းနိုင်ခဲ့ပါတယ်။